Qar barysy - elımızdıŋ ūlttyq simvoldarynyŋ bırı. Qar barysy özderı meken etetın Ortalyq Aziia taularynyŋ sūlu tabiǧatynan, qatal älemınen syr şertedı. Atauynyŋ şyǧu tarihy da san türlı. Mysaly, Jetısu jerınde ilbers, Almatynyŋ şyǧysynda irviz, türkı tılderınde irbiz dep ataǧan.
İrbis jıŋışke, denesı ūzyn, qoldary qysqa, kışıleu kelgen aiaqtary men ūzyn qūiryǧymen közge tüsetın erekşe müsınge ie januar. Ūzyndyǧy qūiryǧymen qosa 200 - 230 sm bolsa , salmaǧy 55 kgdai bolady. Barystyŋ jünderınde saqina tärızdes qara daqtary bar. Ortalyq jäne Oŋtüstık Aziiadaǧy qar barysynyŋ taralu aimaǧy tauly aimaqtardyŋ şamamen 1230000 km² aumaǧyn qamtidy.
Qazaq ejelden barystyŋ batyldyǧyna täntı bolǧan. Tıptı dästürlı jyl sanauymyzdyŋ üşınşı jyly da Barys jyly.
Qar barysy jalpy Qazaqstan üşın tūŋǧyş Prezidenttıŋ "Qazaqstan-2030" jarlyǧyna säikes, resmi simvolǧa da ainalyp ülgerdı. Elımızdıŋ eŋ
ülken qalalarynyŋ bırı - Almaty qalasynyŋ özınıŋ taŋbasynda barys beinesı beinelengen. 1999 jyly 26 şıldeden bastap erekşe eŋbegı üşın 3 därejelı "Qazaq barysy " ordenı de qūryldy. Mysaly, 1-därejelı "Barys" ordenın alǧandar qatarynda Şerhan Mūrtaza, Sauytbek Abdrahmanov, Myrzatai Joldasbekov, Jaqsylyq Üşkempırov syndy tūlǧalar bar.
Sondai-aq Qazaqstandaǧy 2011 jylǧy Qysqy Aziia oiyndarynyŋ simvoly retınde de barys alynǧan bolatyn. Elordada 2015 jyly "Barys Arena" sport kompleksı de aşylǧan. 1999 jyly 26 qaraşada qūrylǧan elordalyq hokkei komandasyna da ūlttyq simvoldyŋ qūrmetıne "Barys" atauy berıldı.
Qazannyŋ 23-ı künı halyqaralyq qar barysy künı atalyp ötıledı. Qar barysy özınıŋ sany, taralu auqymy jaǧynan Qazaqstannyŋ Qyzyl kıtabynda üşınşı sanatqa engen. Būl süikımdı mysyqtūqymdastardan mülde airylmas üşın memleket tarapynan ülken jūmystar atqarylyp jatyr.
Ūljan Tūrlybek
