Äleumettık jelıde bala terbetıp otyryp sabaq oqyǧan qyzdyŋ videosy tarap kettı, dep habarlaidy "Adyrna" ūlttyq portaly exk.kz-ke sılteme jasap.
Beinejazbada şamamen bastauyş synypta oqityn oquşy qyzdyŋ aiaǧyna jastyq qoiyp, oǧan bauyryn jatqyzyp, terbetıp jatqanyn köruge bolady. Osy sätte özı sabaǧyn oryndap otyrady.
Videony körgen jelı qoldanuşylary kışkentai qyzdyŋ bauyrmaldyǧyna riza boldy. Köbı oǧan aiauşylyq tanytyp, qisaiyp otyryp sabaq oryndau balanyŋ densaulyǧyna ziian ekenın alǧa tartty.
"Kışkentaiymyzdan tırlık jasadyq. Jaman bolǧan joqpyz. Qaita qazırden bastap bauyrmaşyl bolyp ösedı", "Ärine, jaqsy. Bıraq sabaqty tüzu otyryp jasau kerek. Omyrtqasyna ziian", "Balaǧa auyr ǧoi", "Eŋ bolmaǧanda sabaq oqyǧanda balalarǧa özımız qaraiyqşy, analar", "Jerde qisaiyp otyru qiyn. Bastan ötken", "Men de ınımdı osylai baǧuşy edım", "Ainalyp keteiın, aqyldy qyz", "Menıŋ qyzym da ınısıne qaraidy. Bauyr degen osyndai boluy kerek", "Qarsymyn. Qyz balany üi şaruasyna üiretken dūrys. Bıraq aldymen sabaǧyn oqysyn", "Obal ǧoi, özımızdıŋ aiaǧymyz talyp ketedı" dep jazdy jelı qoldanuşylary.
"Adyrna" ūlttyq portaly
