Shymkent qalasy ákiminiń orynbasary Erǵalı Bilisbekov kezekti ret turǵyndardy onlaın rejımde qabyldap, 30-ǵa jýyq azamattyń ótinishi men shaǵymdaryn tyńdady.
Qabyldaýda baspana men jumyspen qamtý jáne áleýmettik kómekke qatysty máseleler qaraldy.
Ákim orynbasaryna jeke máselesin aıtqan Azada Ahantaeva turǵyn úımen qamtamasyz etýdi suraǵan. Joldasymen ajyrasqan soń úsh balasymen qalaǵa qonys aýdarǵan. Búginde A.Ahantaeva páter jaldap, qoǵamdyq tamaqtaný ornynda jumys isteıdi. Alaıda turǵyn úı kezegi úshin qujat tapsyrmaǵan.
E.Bilisbekov jaǵdaıdy óz baqylaýyna alatynyn, azamatshaǵa zań aıasyn kómek kórsetetinin jetkizdi. Osy máselege qatysty basqarma basshylaryna úı kezegine turý jóninde túsindirme jumysyn júrgizýdi jáne turaqty jumyspen qamtýdy tapsyrdy.
Onlaın qabyldaýda ataýly áleýmettik kómek suraǵandar da jıi kezdesedi. Ákim orynbasary AÁK-tiń ýaqytsha kómek ekenin, otbasynyń árbir múshesine kedeılik sheginen aspaıtyn jan basyna shaqqandaǵy ortasha tabysy bar azamattarǵa taǵaıyndalatynyn jetkizdi.
Aıta ketsek, kedeılik shegi kúnkóris deńgeıiniń 70% nemese 2022 jyldyń 1 toqsanyna orta eseppen 25 031 teńge bolyp belgilendi .
Sonymen qatar, qabyldaýda AÁK-ke táýeldi bolmaı, jumysqa ornalasyp, tabysyn eselegisi keletin turǵyndar da boldy. Osy oraıda, Erǵalı Dáýletbekuly jumyspen qamtý ortalyǵynyń qyzmetkerlerine naqty tapsyrmalar júktedi.
