Ýkraınanyń Qazaqstandaǵy Tótenshe jáne Ókiletti Elshisi Petr Vrýblevskıı qazaqstandyqtar jınaǵan qarjynyń qaıda jumsalatynyn aıtty. Bul týraly “Adyrna”ulttyq portaly habarlaıdy.
Elshi barlyǵyna ýkraın halqymen yntymaqtastyǵy úshin alǵys aıtyp, Qazaqstan halqynan jınalǵan qarjyǵa dári-dármek pen basqa da eń qajetti taýarlardy alýdyń barysy týraly halyqty habardar etýge ýáde berdi.
«Sizderge kóp rahmet! Bizdiń ortaq kórshimiz qandaı qysym kórsetip jatyrǵany belgili?! Biraq sizder de shydańyzdar. Biz áleýmettik jelilerde kún saıyn aqparatty jańartyp otyramyz. Elshilik táýlik boıy jumys isteıdi, kómekterdi qabyldap otyrady. Rahmet, qymbatty qazaqstandyq dostar! Biz alǵashqy kúnnen bastap qarajat jınaı bastaǵan barlyq eriktilerge alǵys aıtamyz! Barlyǵyńyzǵa, baýyrlarymyzǵa, dostarymyzǵa úlken rahmet!”, - dedi ol baspasóz máslıhaty barysynda.
Vrýblevskıı gýmanıtarlyq júkti jóneltý kezinde kedendegi qıyndyqtarǵa toqtalyp, Qazaqstan men Ýkraına prezıdentteriniń áńgimesinen keıin másele sheshiletinine senim bildirdi.
«Men Syrtqy ister mınıstriniń orynbasarymen tikeleı baılanystamyn. Qandaı da bir suraqtar týyndasa, oǵan qońyraý shalamyn. Bizge qazaqstandyq dostar barynsha kómektesip jatyr. Túsinbeýshilik máselesi áli de bar. Biraq biz balama joldarmen jumys istep jatyrmyz. Qazir osyndaı kómek aǵyny kelýde. Meniń oıymsha, eki prezıdenttiń keshegi áńgimesinen keıin, Prezıdent myrza tıisti organdarǵa olardyń bizge aralaspaýy úshin belgili bir tapsyrmalar beredi dep oılaımyn. Biz endi elshilik úshin tek gýmanıtarlyq kómekke qońyraýlar men habarlamalardy qabyldaıtyn jeke telefon ornatamyz», - dep qosty elshi.
Ol sondaı-aq ýkraın halqyna kómek retinde aýdarylǵan qarajat qarý satyp alýǵa jumsalmaıtynyn basa aıtty.
«Biz kúndelikti qajetti zattardyń tizimin jańartyp otyramyz. Baılanys nómirin, aqsha aýdarýǵa bolatyn shot nómirin jarııalaımyz. Qarý-jaraq pen áskerı tehnıka satyp alýǵa aqsha jumsalmaıdy. Bul túsinikti. Tek qana «gýmanıtarlyq» kómekke jumsalady. Bul bizdiń jumysymyzdyń basty ustanymy», - dep túıindedi Vrýblevskıı.
Eske salaıyq, 26 aqpan kúni Arman Shoraev, Dosym Sátbaev, Muhtar Jakoshev jáne taǵy da basqa belgili qoǵam qaıratkerlerinen quralǵan «El bolashaǵy» belsendi azamattar toby Ýkraınaǵa gýmanıtarlyq kómek kórsetýge qarajat jınaıtynyn jarııalaǵan bolatyn.
3 naýryz kúni qazaqstandyqtar gýmanıtarlyq kómek úshin 100 mıllıon teńgeden astam qarjy jınaǵany belgili boldy.
“Adyrna” ulttyq portaly
