Qazaqstan Prezidentı Ūlttyq bank qyzmetınıŋ qorytyndylary jönınde keŋes ötkızdı. Jiyn barysynda Memleket basşysyna Ūlttyq banktıŋ 2017 jylǧy atqarǧan jūmystary jönınde esep berılıp, elımızdıŋ qarjy sektorynyŋ damu perspektivalary baiandaldy.
Elbasy makroekonomikalyq körsetkışterdıŋ jaqsarǧanyn jäne infliasiianyŋ belgılengen mejeden aspaǧanyn atap ötıp, bank jüiesıne memlekettıŋ qoldau körsetıp jatqanyna, sondai-aq retteuşı tarapynan qarjy instituttarynyŋ qyzmetın qadaǧalaudy küşeitu qajettıgıne nazar audardy.
"Memleket 3 trillion teŋgeden astam qarajat bölıp, bank jüiesıne būryn-soŋdy bolmaǧan qoldau körsettı. Būl rette, bankter tarapynan berılgen nesienıŋ kölemı artpai, 2017 jyldyŋ soŋynda 12,7 trillion teŋgenı qūraǧan. "Jūmys ıstemeitın" nesienıŋ ülesı - 10 paiyz. Biyl körsetkışterı öte naşar bankterdı sauyqtyru jönındegı Ūlttyq bank baǧdarlamasy toqtatylady. Aksionerlerı dūrys basqara almaǧandyqtan būl bankter qaryzǧa batyp, salymşylar aldynda öz mındettemelerın oryndai almady. Sol sebeptı körsetkışterı naşar boldy. Būl jaǧdaidan qalai şyǧuǧa bolady? Būl bankterdı saqtap qalu üşın aksionerler özderınıŋ jeke qarajatyn qūiyp, kezınde olardan şyǧaryp alǧan qarjyny qaitaruǧa tiıs", - dedı Memleket basşysy.
Nūrsūltan Nazarbaev Qazaqstan halqyna arnaǧan joldauynda jäne "Bes äleumettık bastamasynda" körsetılgen qarjy sektoryn qaita jaŋǧyrtu jönındegı şaralarǧa toqtaldy.
"Bügınde ekonomikany ūzaq merzımdı nesiemen qamtamasyz etu mäselesı şeşımın tappai otyr. Qor naryǧyn jandandyru kerek, sondai-aq bank jüiesınde tuyndaǧan jaǧdailardy uaqtyly baǧamdap, tiımdı äreket etu qajet. Bügın Parlamentte talqylanyp jatqan valiutalyq retteu turaly zaŋǧa engızıletın özgerısterdıŋ qabyldanuyna bailanysty "7-20-25" baǧdarlamasy aiasynda atqarylatyn jūmysty biyl bastau kerek. Men qos palata deputattarynan būl mäselenı osy sessiiasynyŋ soŋyna deiın tezdetıp qarastyrudy sūraimyn. Būl ärbır azamatymyzǧa arnalǧan menıŋ "Bes äleumettık bastamamdy" ıske asyru üşın maŋyzdy", - dedı Memleket basşysy.
Daniiar Aqyşev 2017 jyly Ūlttyq banktıŋ qyzmetı naryqtaǧy baǧalardyŋ tūraqtylyǧyn qamtamasyz etuge jäne bank sektorynyŋ jūmysyn bır qalypqa keltıruge baǧyttalǧanyn atap öttı.
"Qarjy naryǧyndaǧy jaǧdai qalypty. Makroekonomikalyq körsetkışter men qarjy sektorynyŋ damu indikatorlary tūraqty türde jaqsaryp keledı. 2018 jyly infliasiia 5-7 paiyz şamasynda bolady dep oilaimyz. Biylǧy aqpan aiynyŋ soŋyndaǧy jaǧdaiǧa säikes, zaŋdy tūlǧalarǧa teŋgemen berıletın nesie stavkasy 12,9 paiyzǧa deiın tömendedı", - dedı Ūlttyq bank töraǧasy.
Būdan bölek, Daniiar Aqyşev teŋgenıŋ aiyrbas baǧamyndaǧy ahual men oǧan yqpal etken ışkı jäne syrtqy faktorlarǧa tüsınık berdı.
"Ötken aptada jekelegen reseilık kompaniialar men tūlǧalarǧa qatysty AQŞ-tyŋ ekonomikalyq sanksiialaryn keŋeituıne bailanysty oqiǧalar boldy. Tiısınşe Reseidıŋ qor jäne valiuta naryǧynda belgılı bır özgerıster oryn aldy. Ärine, olar Qazaqstannyŋ da valiuta naryǧyna äser ettı jäne būl erkın baǧam jaǧdaiynda qalypty närse sanalady. Bıraq būǧan degen naryqtyŋ äserı tura proporsionaldy bolǧan joq. Eger rubl baǧamy 10 paiyzdan astam qūldyrasa, teŋge nominaldy türde aitsaq, 3 paiyzǧa ǧana tömendedı", - dedı Ūlttyq bank töraǧasy.
Jiyn soŋynda Memleket basşysy Ūlttyq bank jūmysynyŋ jaqsara tüskenın atap ötıp, bırqatar naqty tapsyrma berdı.
_______________________________________________________________________________________________________
Tengrinews.kz
Ūqsas jaŋalyqtar
