«Atameken» ulttyq kásipkerler palatasynyń Eńbekshiqazaq aýdandyq fılıalynyń basshysy Baqytgúl Dúısebekovanyń aıtýynsha, 2020 jyly kásipkerlerdi qoldaý oıdaǵydaı júzege asyryldy. Olarǵa jan-jaqty qyzmet kórsetilip, túrli keńester berildi. Sonyń ishinde sátti shyqqan 113 jobaǵa 467 281 286 teńge bólindi.
– Jeke kásip ashýǵa qyzyǵatyndar sany jyl saıyn artyp keledi. Ásirese, jastar jaǵy óte belsendi. Buǵan, árıne, qýanasyń. Óıtkeni, jastar – elimizdiń bolashaǵy. Biz ótken jyly pandemııa qıynshylyqtaryn bastan ótkize júrip kásipkerlikti qoldaý jumystaryn nazardan tys qaldyrmadyq. Nátıjeli jumyspen qamtýdy jáne jappaı kásipkerlikti damytýdyń 2017–2021 jyldarǵa arnalǵan «Eńbek» memlekettik baǵdarlamasy aıasynda «Bastaý Bıznes» jobasy qolǵa alyndy. Osy joba negizinde onlaın formatta 300-den astam adam oqyp, arnaıy sertıfıkattar aldy. Jalpy mundaǵy oqý kýrsy 12 modýlden turady. Onda kásipkerlikke qajetti marketıng negizderi, qarjy saýattylyǵy, bıznes-jospar ázirleý, bıznes-ıdeıany tańdaý sııaqty baǵdarlamalar bar. Alǵan bilimderiniń deńgeıin anyqtaý úshin kýrsqa qatysýshylar arnaıy test tapsyrady. Sarapshylardyń baǵalaýynan ótkender grant alý múmkindigine ıe bolady. Qysqasy, munda kelgen adam kásipkerliktiń qyry men syryn jan-jaqty meńgeredi, – deıdi Baqytgúl Dúısebekova.
Qazirgi tańda osy jobaǵa qatysqandardyń ishinde óz kásibin ashqandar barshylyq. Sonyń biri – Esik qalasynda turatyn Ásem Tynaıbekova. Onyń anasy Gúlnár otyz jyl boıy tiginshi bolyp jumys istepti. Ásemniń boıyna ana tálimi kishkentaıynan daryǵan. Sóıtip ol otbasymen aqyldasa kele tigin ehyn ashýǵa bel býady. Osy maqsatta «Atameken» ulttyq kásipkerler palatasynyń fılıalyna qarasty kýrsta bir aıǵa jýyq oqıdy. Bıznes-jospar qurýdy úırenedi jáne taǵy basqa múmkindikterdi meńgeredi. Nátıjesinde, 200 myń teńge kólemindegi grantqa qol jetkizdi.
– «Jas kásipker» baǵdarlamasy maǵan kóp nárseni úıretti. Sonyń arqasynda jolymyz ashyldy. Bes adamdy jumyspen qamtyp otyrmyz. Biz túrli fırmalar men kompanııa jumysshylaryna arnaıy kıim tigýmen aınalysamyz. Bolashaqta tigin ehyn keńeıtý máselesi de josparymyzda bar. Memlekettiń men sekildi kásipkerlikke umtylǵan jastardy qoldaǵanyna rızamyn. Erinbeı eńbek etseń, kásibiń násibińe aınalady. Oǵan esh kúmánim joq, – deıdi tigin ehynyń ıesi Ásem Tynaıbekova. Aıta bersek, mundaı jarqyn mysaldardy aýdan óńirinde kóptep kezdestirýge bolady.
Bolat MÁJIT
Eńbekshiqazaq aýdany
