Qazaqstan Halyq Keŋesınıŋ müşelerı Nūrsūltan Orynbasarov, Janūzaq Musapirov jäne Baqyt Ataibekov Almaty oblysyna jūmys sapary aiasynda Qaskeleŋ qalasynda bılım jäne äleumettık sala qyzmetkerlerımen, Şamalǧan auylynda medisina mamandarymen, sondai-aq Şalqar auylynda jergılıktı tūrǧyndarmen kezdesıp, Memleket basşysynyŋ Joldauynda köterılgen özektı mäselelerdı talqylady.
Qaskeleŋ qalasynyŋ Mädeniet üiınde ötken kezdesude bılım beru salasyn damytu, inkliuzivtı bılım berudı jetıldıru, erekşe bılım beru qajettılıkterı bar balalarǧa qolaily jaǧdai jasau, bılım beru infraqūrylymyn jaŋǧyrtu jäne pedagogterdıŋ jūmys jüktemesın oŋtailandyru mäselelerı keŋınen köterıldı.
Kezdesu barysynda Keŋes müşesı Nūrsūltan Orynbasarov Prezident Joldauynda aiqyndalǧan negızgı basymdyqtarǧa toqtaldy.
Atap aitqanda, «Halyqtyq qūrylys» baǧdarlamasy aiasynda Ūlttyq qor qarajaty esebınen auqymdy infraqūrylymdyq jobalardy jüzege asyru, jaŋa mektepter, balalar auruhanalary, perzenthanalar men äleumettık nysandar salu közdelgen. Sonymen qatar auyl şaruaşylyǧyn qoldau, fermerlerge ūzaq merzımdı investisiialyq qarjy bölu, auyldardy gazdandyru, sumen qamtamasyz etu jäne agrologistikany damytu mäselelerıne basymdyq berıletını aityldy.
Sondai-aq äleumettık ädıldıktı qamtamasyz etu, azamattardyŋ tabysyn arttyru, därıgerler men pedagogterdıŋ eŋbegın qoldau jäne memlekettık kömektı şyn mänınde mūqtaj azamattarǧa baǧyttau mäselelerı de nazardan tys qalǧan joq.
Äleumettık sala qyzmetkerlerımen ötken basqosuda Keŋes müşelerı memlekettık äleumettık qoldau jüiesın jetıldırudıŋ maŋyzyn atap öttı. Memleket basşysy Qasym-Jomart Toqaevtyŋ «Memlekettık kömek şyn mūqtaj adamdarǧa ǧana berıluge tiıs» degen ūstanymyn negızge ala otyryp, äleumettık saiasattaǧy ärbır reformanyŋ azamattardyŋ tūrmys sapasyna yqpalyn eskeru qajettıgı aityldy.
Al Şamalǧan auylynda medisina qyzmetkerlerımen ötken kezdesude Keŋes müşesı Janūzaq Musapirov densaulyq saqtau salasyn damytu baǧytyndaǧy mındetterge toqtaldy.
Prezident Joldauynda elımızde segız zamanaui perinataldyq ortalyq pen jetı köpbeiındı balalar auruhanasyn salu josparlanǧany atap ötıldı. Jaŋa medisinalyq nysandardyŋ qatarynda Qaskeleŋ qalasynyŋ da boluy audan tūrǧyndary üşın maŋyzdy jaŋalyq ekenı aityldy. Būl bastama balalarǧa körsetıletın medisinalyq kömektıŋ qoljetımdılıgın arttyryp, öŋırdıŋ densaulyq saqtau infraqūrylymyn damytuǧa mümkındık beredı.
Sonymen qatar alǧaşqy medisinalyq-sanitarlyq kömek jüiesın jaŋǧyrtu, medisina qyzmetkerlerın qoldau, medisinalyq qyzmet sapasyn arttyru jäne erekşe qajettılıkterı bar balalarǧa arnalǧan infraqūrylymdy jetıldıru mäselelerı talqylandy.
Jūmys sapary Şalqar auylynyŋ tūrǧyndarymen ötetın kezdesumen jalǧasty. Basqosu barysynda Joldauda belgılengen eldıŋ äleumettık-ekonomikalyq damu basymdyqtary, energetika salasyn jetıldıru, halyqtyŋ äl-auqatyn arttyru jäne öŋırlerdegı özektı mäselelerdı şeşu joldary söz boldy.
