Türkiianyŋ Antaliia qalasyna diplomatiialyq forumǧa Nūrsūltan Nazarbaevty alyp barǧan ūşaq äzırge Qazaqstanǧa qaitqan joq. Ūşaq reisterın baqylaityn Radarbox caitynyŋ mälımetıne qaraǧanda, Nazarbaevqa tiesılı Airbus 330-243 ūşaǧy 5 kün būryn Antaliia äuejaiyna qonǧan soŋ qaityp ūşpaǧan, dep jazady "Adyrna" ūlttyq portaly "Azattyq radiosyna" sılteme jasap.
Diplomatiialyq forum 11 nauryzda bastalyp, keşe aiaqtalǧan. Forum baǧdarlamasy boiynşa soŋǧy künnıŋ jūmysy Türkiia uaqytymen tüskı saǧat 12-de bıtken.
Baspasöz hatşysy Aidos Ükıbai tvitterde eks-prezidenttıŋ Türkiiaǧa prezident Rejep Taiyp Erdoǧannyŋ şaqyruymen barǧanyn jazǧan. Jiynnyŋ alǧaşqy künı Erdoǧan Nazarbaevty jeke qabyldap, kezdeskenı habarlandy.
Bıraq eks-prezidenttıŋ forumda resmi söz söilegen-söilemegenı belgısız. Ärı forumnyŋ resmi saitynda qatysuşylar tızımındegı 209 adamnyŋ ışınde Nazarbaevtyŋ aty-jönı joq.
Nazarbaev bilıkten ketkenge deiın de, keiın de UP-A3001 bort nömırımen tırkelgen ūşaqpen ūşyp jür. 2019 jyly Azattyq N1 borttyŋ prezident Toqaevqa berılmegenın zerttegen. Zertteu şyqqan soŋ reisterdı baqylau saittaryndaǧy memlekettık "Bürkıt" äue kompaniiasynyŋ ūşaqtary jaily derek būǧatqa qoiylǧan.
13 nauryzda Qazaqstannyŋ sybailas jemqorlyqpen küres agenttıgı Nazarbaevtyŋ nemere ınısı Qairat Satybaldynyŋ qamauǧa alynǧanyn habarlady. Satybaldy "Qazaqtelekomnyŋ" qomaqty qarjysyn jymqyrdy jäne qyzmettık ökıletın asyra paidalandy" degen küdıkke ılıngen. Qairat Satybaldy – Qazaqstannyŋ būrynǧy prezidentı Nūrsūltan Nazarbaevtyŋ nemere ınısı.
"Adyrna" ūlttyq portaly
