Memleket basshysynyń «Jańa Qazaqstan: jańarý men jańǵyrý joly» atty halyqqa Joldaýynda aıtylǵan azamattyq qoǵam ınstıtýttaryn jańa formatta damytýdyń mehanızmderin talqylaý úshin respýblıka kóleminde birinshi bolyp Qazaqstannyń Azamattyq Alıansynyń semınary Syr óńirinde uıymdastyryldy, dep jazady "Adyrna" ulttyq portaly.
Sharanyń negizgi maqsaty – jańa baǵyttardy aıqyndaý, úkimettik emes uıymdarmen jumys jasaý boıynsha basqa óńirlermen tájirıbe almasý.
Semınar jumysyna Qazaqstannyń Azamattyq Alıansynyń Prezıdenti Baný Nurǵazıeva, Nur-Sultan qalasynyń, Qostanaı, Aqtóbe, Mańǵystaý, Túrkistan jáne basqa da oblystardyń Azamattyq Alıans kóshbasshylary, óńirdegi belsendi úkimettik emes uıymdar men BAQ ókilderi qatysty.
Sharaǵa qatysqan oblys ákiminiń orynbasary Qaırat Nurtaı óz sózinde elimizdegi azamattyq qoǵam negizderin damytýda Qazaqstannyń Azamattyq Alıansynyń úlesi zor ekenin jetkizdi.
Shara barysynda respýblıkanyń ár óńirinen kelgen spıkerler azamattyq sektordy damytýdyń jańa ádis-tásilderin usynyp, óz oılaryn ortaǵa saldy.
Sonymen qatar, úkimettik emes uıymdar salasyndaǵy ózekti taqyryptar: Azamattyq ortalyq jumysyn uıymdastyrý strategııasy, úkimettik emes uıymdardyń áleýetin arttyrýdaǵy azamattyq ortalyqtardyń róli, aýyldyq úkimettik emes uıymdarǵa qoldaý kórsetýdi uıymdastyrý, memlekettik organdarmen baılanysty nyǵaıtý, memlekettik áleýmettik tapsyrysty qalyptastyrý, onyń monıtorıngin jáne baǵalaý tetigin jetildirý máseleleri qaralady.
"Adyrna" ulttyq portaly
