Beısenbi kúni Pavlodarda Kýtýzov kóshesiniń atyn Táýelsizdik dep aýystyrýǵa baılanysty qoǵamdyq tyńdaý ótti. Halyqtyń kóbi bul ózgeristi qoldaǵany-men, ártúrli kózqarastar da aıtyldy, dep habarlaıdy Qamshy.kz aqparat agenttigi.
Jaryssózge shyqqan kerekýlikter kezek-kezek pikir bildirip jatty.
Qazaqstan Jazýshylar odaǵy Pavlodar oblystyq fılıalynyń dırektory Arman Qanı tarıhı derekpen bultartpas ýáj keltirdi.
— Qurmetti jerlester! Men Kýtýzovtyń uly qolbasy ekenin túsinemin, biraq Qazaqstan úshin emes, Reseı úshin (dý qol shapalaq). Onyń Qazaqstanǵa eshqandaı qatysy joq. Pavlodarǵa tipti bes qaınasa sorpasy qosylmaıdy. Bul jerge Napoleon emes, jońǵarlar shabýyl jasaǵan. Jońǵarlardan bizdi Malaısary, Oljabaı, Jasybaı syndy batyrlar qorǵady. Ókinishtisi, olardyń eshbiriniń atyna Pavlodarda kóshe berilgen joq. Árıne, men Kýtýzov kóshesin Táýelsizdik dańǵyly dep ózgertýdi jaqtaımyn! — dedi aqyn.
Táýelsizdik ataýyna negizinen ózge ult ókilderi, ásirese, etnıkalyq orystar qarsy shyqty. Pavlodar turǵyny Lıýbov Dobrynına kóshe ataýyn ózgertý úlken shyǵyn ekenin aıta kelip, «bılik sol aqshaǵa joldardy jóndep, kósheni kórkeıtsin» degen talap qoıdy.
Kósheniń burynǵy ataýyn qaldyrý úshin: «Kýtýzovtyń atasynyń aty – Qutuz, tuqymy – túrki», — deýshiler de boldy.
Al kerekýlik jýrnalıst Esenbek Sanatuly: «Táýelsizdik ataýyna qarsy adamdar – qazaqtyń táýelsizdigine qarsy adamdar», — dep tótesine kóshti.
Pavlodardyń qurmetti azamaty Ahmet Demesinov qaladaǵy Lermontov kóshesine Qonaevtyń esimin berýdi usyndy.
Jıyn sońynda kópshiliktiń daýys berýimen Kýtýzov kóshesiniń ataýyn Táýelsizdik dep ózgertý maquldandy. Qoǵamdyq tyńdaýda aıtylǵan ár pikir hattamaǵa tirkeledi. Hattama jeti kún ishinde BAQ-ta jáne resmı ınternet-resýrstarda jarııalanady. Qajetti qujattar onomastıkalyq komıssııaǵa joldanady.
_____________________________________________________________________________________________________________
qamshy.kz
