Jetisaı aýdany turǵyndarymen kezdesý barysynda Túrkistan oblysynyń ákimi Ómirzaq Shókeev osylaı dedi. Oblys basshysy aldymen Yntymaq aýyldyq okrýgi, Aqnıet eldi mekenindegi qyryqqabat alqabyna baryp, kásipkerlermen, dıqandarmen, sharýalarmen júzdesip, ótinishterin tyńdady. Aǵyn sý máselesi, sýbsıdııa jáne ózge de túıtkilder boıynsha usynystaryna qulaq asty. Sharýa qojalyǵynyń egesi bıyl 12 gektar jerge qyryqqabat egip, 400 tonna ónim jınaıtynyn jetkizdi. Odan keıin maqta egip, ekinshi ónim alady. Bıyl qyryqqabattyń 1 kelisi egistik basynan 280 teńgege satylýda.
– Óńirimizdiń negizgi draıveri – aýyl sharýashylyǵy. Biz aǵyn sý máselesin, dıqandarǵa jaǵdaı jasaý joldaryn únemi nazarda ustap kelemiz. Árdaıym sharýalar jaǵyndamyn. Memleket basshysy halyqqa joldaýy aıasynda
elimizde saıası reformalar jasalyp jatyr. Ony ózderińiz bilesizder. Ákimderge kóp nárse júkteldi. Geosaıası jáne ekonomıkalyq jaǵdaı ońaı emes. Eń birinshi sheshetin máselemiz – jumyssyzdyqpen kúresý. Barlyq aýdan, qalada demografııalyq ósim joǵary. Sondyqtan jumys oryndaryn ashý baǵytynda jumysty kúsheıtýimiz kerek. Búginde oblysymyzda 150 myń shaǵyn jáne orta bıznes sýbektileri bar. Ár sýbektide kem degende on adamnan jumys isteıtin bolsa, sol arqyly bir mıllıonnan astam adam jumyspen qamtylmaq. Jetisaıda «Bıznes Bastaý» jáne ózge de memlekettik baǵdarlamalar boıynsha jeke kásipkerlikti damytý baǵytynda jaqsy jumys júrip jatyr. Aýyl sharýashylyǵyna kelsek, jańa men egistik basynda sharýalarmen kezdestim. Bizdiń aýa-raıymyz bir jylda eki-úsh ret ónim alýǵa múmkindik beredi. Erte pisetin kókónisti ósirýge óte qolaıly. Túrli tásilderdi sharýalarǵa usynyp jatyrmyz. On eki gektar jerge qyryqqabat egip, qazirdiń ózinde kelisin shamamen úsh júz teńgege saýdalaýda. Jalpy 400 tonnadaı ónim alyp, alǵashqy túsimniń ózinen paıdaǵa kenelip otyr. Bul tirlik eń myqty kásipkerlerdiń qolynan ǵana keledi. Kásipkerlikke ebi bar azamattardy taýyp, úıretken jón, – degen Ómirzaq Shókeev turǵyndardyń gaz jáne ınfraqurylymǵa qatysty ózge de suraqtaryna jaýap berdi.
Búginde Jetisaı aýdanynyń dıqandary qyryqqabattyń erte pisetin túrlerinen 200 tonna ónim jınap, Reseıge eksporttap úlgerdi. Ár gektarynan on mıllıon teńgeden astam taza tabys túsýde. Osy jetistikke toqtalǵan óńir basshysy «Syrdarııa» ýnıversıteti mańynda ashyq aspan astynda Jetisaı turǵyndarymen kezdesip, suraqtaryna jaýap berdi.
– Oblys ortalyǵyna shalǵaı ornalasqandyqtan men Jetisaı men Maqtaaralǵa ádeıi jıi kelip turamyn. Bul jaqtaǵy máselelerdiń bári maǵan jaqsy tanys. Gaz ben aýyz sý máselesi ózekti. Men arnaıy zertteýge tapsyrma berdim. Zertteý arqyly Atakentte 150 jylǵa jetetin sý qory bar ekeni anyqtaldy. Ony de el ıgiligine berý júzege asady. Ekinshiden, gaz máselesi týraly suraqtaryńyzǵa kelsek, eki gaz taratý stanııasy bar. Olar óz kúshinen artyq júmys istep jatyr. Bárin qamtýǵa kúshteri jetpeıdi. Sol úshin 2 úlken AGRS salýǵa kiristik. Bireýi – Atakentte, ekinshisi Jetisaıda boı kóteredi. Ol ekeýiniń qurylys bitken soń aımaq tolyq gazben qamtylady. Árbir sala boıynsha damý tqjyrymdamasy, josparlary bar. Jetisaıdy abattandyrý, áleýmettik nysandarmen qamtý jumystary da kezeń-kezeńimen júzege asady, – dedi oblys ákimi.
Kezdesýden keıin Ómirzaq Shókeev bir top turǵyndy jeke qabyldap, ótinishteri men aryz-shaǵymdaryn tyńdady. Árbir ótinish hattamaǵa engizilip, zań aıasynda jumys júrgiziledi. Jaýapty basshylarǵa, aýdan ákimine jumyssyzdyqpen kúresti kúsheıtý, olardyń sanyn naqtylaý, qurylysty sapaly atqarý jáne ózge de salalar boıynsha tapsyrmalar berdi. Ashyq aspan astyndaǵy júzdesýlerde turǵyndar oblys basshysymen emen-jarqyn áńgimelesip, suraqtaryna jaýap aldy. Óńirde atqarylyp jatqan jumystarǵa oń baǵalaryn berdi.
Ómirzaq Shókeevtiń «Asyl qazyna jáne teń qoǵam» áleýmettik qyzmet kórsetý ortalyǵynda erekshe kútimdi qajet etetin turǵyndarmen, kópbalaly ata-analarmen, Ájeler keńesi men Ákeler keńesi ókilderimen kezdesýde jurtshylyq tarapynan mektep salý, ınfraqurylym taqyrybynda ótinishter berildi. Oblys ákimi bul usynystar da nazarǵa alynyp, zań aıasynda sheshiletinin jetkizdi. Suranysqa saı mektep salynyp, medıınalyq qurylǵy áperiletini aıtyldy.
Túrkistan oblysy ákiminiń baspasóz qyzmeti
