Bir kezde Sara Nazarbaevanyń bastamasymen paıda bolǵan "ózin-ózi taný" páni endi oqýshylardyń tańdaýyna qaraı bir synypta ǵana oqytylady. Al osy mamandyq boıynsha ýnıversıtette oqyp jatqan nemese dıplom alǵan adamdar qaıtedi? Bul suraqqa Bilim jáne ǵylym mınıstri Ashat Aımaǵambetov úkimet otyrysynan keıin jaýap berdi, dep jazady "Adyrna" ulttyq portaly inbusiness.kz-ke silteme jasap.
"Ózin-ózi taný páni qosymsha emes, mindetti pán retinde bir emes, bes emes birneshe jyl oqytylyp keldi. Jumasyna bir saǵat ótkiziledi. Biz bıyl sheshim qabyldadyq. Kelesi oqý jylynan bastap osy pán bir synypta oqýshylardyń tańdaýymen oqytylady. Mysaly, oqýshylar besinshi synypta osy pándi oqımyz dep tańdaýy múmkin. Tańdamasa, mindetti pán retinde múlde oqytylmaıdy", – dedi Bilim jáne ǵylym mınıstri Ashat Aımaǵambetov.
Qaı synypta tańdaý múmkindigi usynylatyny áli naqtylanbady.
Onyń aıtýyna qaraǵanda, "ózin-ózi taný" pánin negizgiden tańdaý pánine aınaldyrý sheshimi "júrgizilgen taldaý nátıjesinde" qabyldandy. Mınıstr "saıası astary bar ma?" degen saýalǵa jaýap berýden bas tartty.
"Ýnıversıtetterde áleýmettik pedagog jáne ózin-ózi taný" degen mamandyq boldy. Onyń eń birinshi mamandyǵy – áleýmettik pedagog. Sondyqtan dıplom alǵan jastar áleýmettik pedagog retinde jumys isteıdi. Al mektepterde bul pánnen kóbine basqa pán muǵalimderi qosymsha oqytqan. Olar óz mamandyqtarymen sabaq berýdi jalǵastyrady. Joǵary oqý oryndarynda osy mamandyqtyń bastapqy birinshi, ekinshi kýrsynda oqyp júrgen stýdentter basqa mamandyqqa aýysa alady", – dep túsindiredi Aımaǵambetov.
"Adyrna" ulttyq portaly
