Búgin Jeńistiń 77 jyldyq merekesinde aımaq Qyzylorda oblysynyń ákimi Nurlybek Nálibaev barlyq maıdangerge arnaıy baryp, Prezıdent atynan quttyqtap, qurmet kórsetti. Ol Qazaly, Syrdarııa, Shıeli aýdandary men Qyzylorda qalasynda turatyn soǵys ardagerleriniń shańyraǵynda bolyp, arnaıy syı-sııapat usyndy, dep habarlaıdy “Adyrna” ulttyq portaly.
Búgingi kúni Qyzylorda óńirinde 7 Uly Otan soǵysynyń ardageri bar. Merekede Týlany azat etýge qatysqan Qabaq Smaǵul, Belorýssııa, Polsha, Chehoslovakııa, Kalınıngrad qalalaryn nemis basqynshylarynan azat etýge úles qosqan Tileýbergen Tobabergenov, Stalıngradty, Kýrskini, Polshany jaýdan qorǵaǵan Iahııa Tasyrov, Stalıngradtta shaıqasynda erligimen kózge túsken Sársenbek Baıjanovtyń eńbegi dáripteldi.
Sondaı-aq, Ýkraınany azat etýde janqııarlyq erlik kórsetken Tólegen Júnisov, Kýrsk shaıqasynda tabandylyq tanytqan Ábdirahman Báıtikov pen Belorýs frontynyń dala gospıtalinde medbıke qyzmetin atqaryp, batyldyq kórsetken Lıýbov Kolesnıktiń erlik joly aıtylyp, olarǵa iltıpat kórsetildi.
Nurlybek Nálibaev maıdangerler qashanda qurmetke laıyq ekenin jáne olardy qoldaý sharalary bir kúnmen shektelip qalmaıtynyn, erligi árdaıym dáripteletinin jetkizdi.
“Batyr ákelerimiz ben analarymyzǵa tıisti deńgeıde qurmet kórsetý - bizdiń perzenttik paryzymyz. Sizder Otanymyzǵa Jeńistiń jalaýyn jelbiretip, beıbit zamandy keler urpaqqa amanat ettińizder. El basyna kún týǵan surapyl soǵys jyldary adam tózgisiz qıynshylyqtardy qaıyspaı kóterip, eldiń qorǵany bolǵandaryńyz úshin Sizderge bas ıemiz”, - dedi Nurlybek Nálibaev.
Maıdangerler elge tynyshtyq tilep, aq batasyn berdi.
“Qıyndyqtyń bári artta qaldy. Endi soǵys bolmasyn.Syrttyń suq kózderinen saqtap, elde tek aýyzbirshilik ornasyn. El qamyn oılar azamattar aman bolyp, ár shańyraqta bereke uıa salsyn”, - dedi ǵasyr jasaǵan ardager Iahııa Tasyrov.
Aıta keteıik, bul kúni Taǵzym alańynda Jeńistiń 77 jyldyǵyn merekeleýge arnalǵan saltanatty is-shara ótti. Óńirde soǵys ardagerleriniń erlikterin dáripteýge arnalǵan túrli deńgeıdegi jobalar jasalyp, dýmandy konert qoıyldy.
”Adyrna” ulttyq portaly
