Jaqynda «Adyrna» ulttyq-etnografııalyq birlestigi Almaty qalasynyń Ishki saıasat basqarmasynyń qoldaýymen iske asyrylyp jatqan «Azamattyq borysh» jobasy aıasynda Qalalyq memlekettik muraǵatynda aýǵan soǵysy ardageri Bolat Quramysovpen «Men kórgen soǵys» atty taqyrypta kezdesý ótkizdi. Bul jıynǵa muraǵattyń qyzmetkerleri jáne basqa da qonaqtar qatysty.
Muraǵat dırektorynyń orynbasary Isalova Aısulý Mádeshqyzy jıyndy ashar aldyndaǵy sózinde otandy qorǵaý ár azamattyń boryshy ekeni týraly keńinen áńgimelep ótti. «Azamattyq borysh» jobasynyń jetekshisi Jandos Naýryzov Aýǵan soǵysy týraly baıandama jasap, soǵys týraly kóptegen málimetter keltirdi. Sodan soń osy kezdesýge arnaıy daıyndalǵan soǵys kezinde túsirilgen fotosýretter jınalǵan slaıd-shoý kórsetildi. Slaıd-shoýdyń mazmuny aýqymdy bolǵandyqtan kezdesýge qatysyp otyrǵan qatysýshylardyń qyzyqshylyǵyn týǵyzdy. Kelesi kezekte sóz is-sharanyń qonaǵy Aýǵan soǵysynyń ardageri Bolat Quramysovqa berildi. Aýǵan soǵysynyń ardageri, kóptegen medalderdiń ıegeri Bolat Ánýarbekuly óziniń ómir jolyna qysqasha toqtalyp, nege áskerı mamandyq tańdaǵanyn, qalaı Aýǵan soǵysyna barǵanyn qyzǵylyqty etip keńinen baıandady.
Bolat Quramysov Aýǵan soǵysynda úlken áskerı áýejaıda qyzmet etken. Kóptegen qarý-jaraq, emdeý apparattary men dáriler jáne basqa da júkterdi qabyldaý, ushaqtardy árdaıym daıyndyqta ustaý úlken jaýapkershilikti talap etetin jumys. Bolat Ánýarbekuly soǵysta bolatyn qaýipti jáne qıyn jaǵdaılar týraly da estelikterimen bólisti. Ásirese soǵys ardageriniń qaza tapqandardy ushaqpen jóneltý týraly aıtqandary qatysýshylarǵa qatty áser etti. Jıynǵa qatysýshylar adargerge kóptegen suraqtar qoıdy. Bolat Ánaýbekuly barlyq suraqtardy muqııat tyńdap tolyq jaýap berip otyrdy.
Áńgime Aýǵanstandaǵy dinı terrorıstik qozǵalystar týraly órbidi. Bolat Quramysov pen «Adyrna» birlestiginiń basshysy Arman Áýbákir bul másele jóninde ózderiniń oılaryn ortaǵa saldy. Muraǵat qyzmetkeri Imashova Aqbópe Imashqyzy jáne basqa da qatysýshylar osy ózekti másele boıynsha óz pikirlerimen bólisti.
Osy bir qyzǵylyqty da tanymdyq paıdasy mol is-sharany joba jetekshisi Jandos Naýryzov qorytyndylap, soǵys ardageri B.Quramysovqa, muraǵattyń qyzmetkerlerine jıynǵa qatysyp, onyń jaqsy ótýine atsalysqandary úshin alǵysyn bildirdi. Jıynnyń aıaǵynda muraǵat qyzmetkerleri is-sharanyń qonaǵy, Aýǵan soǵysynyń ardageri Bolat Quramysovpen estelik fotoǵa tústi.
