Nyǵmatýlın degen famılııany estise kópshilik Parlament minberindegi depýtattardy «qýyryp otyrǵan» sheneýnikti elestetedi. Ol zańdy da. Uzaq jyldar boıy Nurlan Nyǵmatýlın Parlament májilisiniń tóraǵasy laýazymyn ıemdenip keldi. «Qasiretti qańtar» oqıǵasynan keıin elimizde saıası ózgerister bastaldy. Burynǵy bıik qyzmet, bylǵary kresloda otyrǵan talaı sheneýnik qyzmetinen alyndy, óz erkimen ketti, keıbiri ustaldy, temir torǵa qamaldy. Qyzmetinen ketkenderdiń arasynda Nurlan Nyǵmatýlın de bar.
Aqpannyń alǵashqy kúninde Nyǵmatýlın óz erkimen qyzmetinen ketetinin aıtty. Ol Májilis tóraǵasy qyzmetinde on jylǵa jýyq jumys atqarǵan, salmaǵy basym saıasatkerdiń biri bolatyn. «Uzaq jyldar boıy túrli saıası qyzmet atqarǵan sátte, men memleket basshysynyń qoldaýyn sezinip keldim. Daýys berýshilerge erekshe alǵys aıtqym keledi, olar osynsha jyl boıy Parlamentte óz múddelerin bizge tapsyryp, senim artty. Sonymen birge barlyq depýtattarǵa, barlyq úsh shaqyrylymdaǵy depýtattar ókilderine shyn júrekten alǵys bildirgim keledi», dedi ol. Sóz arasynda ol prezıdentpen qosa, Nazarbaevqa da alǵys aıta ketýdi jón sanady. Naqtyraq aıtsaq bylaı dedi:
«Ár zań el damýyna yqpal etetin sondaı bir óte qyzý tartysqa toly mańyzdy, jaýapkershiligi mol jyldar boldy. Búgin men eń aldymen alǵys sózin Elbasymyz, Nur Otan partııasynyń negizin qalaýshy Nursultan Nazarbaevqa jáne qazirgi memleket basshysy men partııanyń tórǵasy Qasym-Jomart Kemelulyna bildirgim keledi, olar maǵan senim artqany úshin kóp alǵys»,- dedi eks Májilis tóraǵasy.
Nyǵmatýlınge qatysty artynsha san túrli aqparat shyqty. Mamyr aıynyń ortasynda Nurlan Nyǵmatýlın elden ketti degen aqparat paıda boldy. Alaıda artynsha Nurlan Nyǵmatýlınniń Nur-Sultan qalasyndaǵy saýda úıleriniń birinde, kınoteatrǵa kelgen vıdeosy jarııalandy. Ol kınoteatrǵa kirer aldynda telegram arnalardyń birine kishigirim pikir bildirip, «elden ketýge sebep joqtyǵyn, endigi ýaqytyn nemereleri men otbasy janynda ótkizetinin» aıtqan bolatyn.
Alaıda naýryz jańalyqqa toly boldy. Atyshýly Qaırat Satybaldy ustalyp, tergeýge qamaldy. Ol Nazarbaev áýletine jaqyndardyń biri jáne eldegi teris dinı baǵyttyń beıresmı kósemi sanalady degen de aqparattar bar. Artynsha Qaırat Satybaldynyń jubaıy men Qaırat Boranbaev ta ustaldy. Boranbaev Nursultan Nazarbaevtyń burynǵy qudasy. Osy aqparattardan keıin Nurlan Nyǵmatýlın elden ketti degen aqparat taǵy shyqty. Bul joly naqty derektermen. Nurlan Nyǵmatýlın naýryz aıynyń sońynda Atyraý qalasyna jeke ushaǵymen ushyp baryp, artynsha Ázerbaıjan astanasy Bkkýge attandy degen málimet tarady. Ol Comlux kompanııasynyń bortyna otyryp, Bakýge ushqan delinedi. «Osylaısha Nurlan Nyǵmatýlın Ázerbaıjan arqyly ózge elge ketýi múmkin jáne Atyraýǵa ushý tek iz sýytý ádisi» degen jandar da boldy. Nyǵmatýlınder áýletine jeke ushaqtyń tıesili ekenin eskersek, bári de múmkin.
Nyǵmatýlınder áýleti demekshi. Nurlan Nyǵmatýlınnen bólek Erlan Nyǵmatýlın de el aýzynda júrgen adam. Ótken jyly Qazaqstannyń eń bedeldi kásipkerleriniń ishinde Forbs reıtıngi boıynsha 32 oryndy ıemdengen ol, «Saryarqa Nan Qaraǵandy» JShS, «Balqash Nan» JShS, «Pýls» JShS (bólshek saýda, qonaq úı bıznesi, qalaaralyq jolaýshylar tasymaly), «Órken Medıa» JShS jáne «Trend Capital» JShS naýbaıhanalarynyń jalǵyz quryltaıshysy bolyp tabylady.
Ózge eki tulǵamen birge «YDD Corporation» JShS Qaraǵandy ferroqorytpa zaýytyna ıelik etedi. Ol «Qarajyra» kómir óndirýshi AQ akıoneri, Davıd Kemertelıdzemen birge «Qaz Carbon» JShS-niń ıesi. Bul kásipten bólek ózge de bıznes túrlerine ıe ekeni aıtylyp júr.
Atadan baılyq, ákeden mıras qalmaǵan soń (KSRO zamanynda jeke kásipke tyıym salyndy), mundaı asqan baılyqty, sansyz kásip ornyn qalaı ashqany, qalaı qol jetkizgeni kópshilikke kúmándi.
Nurlan Nyǵmatýlıniń uly Nurjan Nurlanovońaı-ospaq adam emes. Ol osyǵan deıin«QazMunaıGaz-Aero» kompanııasynyń bas dırektory qyzmetin atqarǵan edi, al kúni keshe ǵana onyń qyzmetten ketip, ornyna Ildar Shamsýtdınov esimdi azamattyń kelgeni jaıly aqparat tarady. Osylaısha ákesi tóraǵalyqtan ketken Nurjan dırektorlyqtan ketti.
Nyǵmatýlınderge qatysty pikir kóp. Biri Nurlandy tisqaqqan saıasatker sanap, «onyń saıası ambıııasy orasan edi» dese, ekinshisi eski bıliktiń jarqyn ókili deıdi. Alaıda bir qyzyǵy qyzmetten ketken Nyǵmatýlınderge qatysty qoǵamdy eleń etkizer qandaı da bir aqparat áli shyqpady. Qańtardan keıin bılikten ketken saıasatkerdiń sońynan sóz ben antıkor eretinin kóz kórgen qoǵam, bul jaıtqa tańyrqap otyr...
Maqsut Samatuly
