Mádenıet jáne sport mınıstri Dáýren Áskerbekuly Sháken Aımanov atyndaǵy «Qazaqfılm» akıonerlik qoǵamy janynan «Qazaqanımaııa» shyǵarmashylyq birlestigin qurý boıynsha jıyn ótkizdi, dep habarlaıdy "Adyrna" ulttyq portaly.
"Ózderińizge belgili, jas urpaq tárbıesi anımaııamen tyǵyz baılanysty. Qazirgi tańda búlidirshinderimiz batystan úzdiksiz kelip jatqan sheteldik ónimderdi qarap, tilimizge de, dilimizge de qaıshy mýltfılmderdi kóptep kórip jatqany jasyryn emes. Sol sebepti de biz ózimizdiń ulttyq qundylyqtarymyzǵa negizdelgen otandyq ónimderimizdiń órisin keńeıtýdi qolǵa alyp otyrmyz. Mádenıet jáne sport mınıstrliginiń tikeleı bastamasymen «Qazaqanımaııa» birlestiginiń jumysyn iske qosý – eń aldymen ulttyq anımaııany qoldaýdyń jańa júıesin qalyptastyrady. Árıne, aýqymdy jumysty birden jolǵa qoıý ońaı emes" dedi ol.
Sondaı-aq jıynda otandyq anımaııa mamandarynyń sheteldik kompanııalarda taǵylymdamadan ótýi jaıly másele jan-jaqty saralandy. Búginde álemniń birneshe jetekshi anımaııalyq stýdııasynan sheteldik maman tartý arqyly, jyl sońyna deıin alǵashqy 10 pılottyq jobany kórermenge usynýdy kózdep otyrmyz.
"Biz osy jumystar arqyly ulttyq anımaııanyń básekege qabilettiligin arttyryp, ol ónimderdi úlken prokatqa shyǵarýdy josparlaımyz. Zaman kóshinen qalmaı, bilimdi de bilikti shyǵarmashyl jastarymyzdy qoldap, jańa ıdeıalar men tyń bastamalarǵa yńǵaıly alań jasaýymyz qajet. Aýdıtorııa suranysyn qanaǵattandyratyn sapaly kontent qalyptasyryp, sheteldik áriptestermen tyǵyz baılanys negizinde qazaq anımaııasyn halyqaralyq dárejege kóteremiz dep senemin" dep qosty Abaev.
