داۋرەن اباەۆ: جاس ۇرپاق تاربيەسى انيماتسيامەن تىعىز بايلانىستى

3213
Adyrna.kz Telegram

مادەنيەت جانە سپورت ءمينيسترى داۋرەن اسكەربەكۇلى شاكەن ايمانوۆ اتىنداعى «قازاقفيلم» اكتسيونەرلىك قوعامى جانىنان «قازاقانيماتسيا» شىعارماشىلىق بىرلەستىگىن قۇرۋ بويىنشا جيىن وتكىزدى، دەپ حابارلايدى "ادىرنا" ۇلتتىق پورتالى. 

"وزدەرىڭىزگە بەلگىلى، جاس ۇرپاق تاربيەسى انيماتسيامەن تىعىز بايلانىستى. قازىرگى تاڭدا بۇلىدىرشىندەرىمىز باتىستان ۇزدىكسىز كەلىپ جاتقان شەتەلدىك ونىمدەردى قاراپ، تىلىمىزگە دە، دىلىمىزگە دە قايشى مۋلتفيلمدەردى كوپتەپ كورىپ جاتقانى جاسىرىن ەمەس. سول سەبەپتى دە ءبىز ءوزىمىزدىڭ ۇلتتىق قۇندىلىقتارىمىزعا نەگىزدەلگەن وتاندىق ونىمدەرىمىزدىڭ ءورىسىن كەڭەيتۋدى قولعا الىپ وتىرمىز. مادەنيەت جانە سپورت مينيسترلىگىنىڭ تىكەلەي باستاماسىمەن «قازاقانيماتسيا» بىرلەستىگىنىڭ جۇمىسىن ىسكە قوسۋ – ەڭ الدىمەن ۇلتتىق انيماتسيانى قولداۋدىڭ جاڭا جۇيەسىن قالىپتاستىرادى. ارينە، اۋقىمدى جۇمىستى بىردەن جولعا قويۋ وڭاي ەمەس" دەدى ول.

سونداي-اق  جيىندا وتاندىق انيماتسيا ماماندارىنىڭ شەتەلدىك كومپانيالاردا تاعىلىمدامادان ءوتۋى جايلى ماسەلە جان-جاقتى سارالاندى. بۇگىندە الەمنىڭ بىرنەشە جەتەكشى انيماتسيالىق ستۋدياسىنان شەتەلدىك مامان تارتۋ ارقىلى، جىل سوڭىنا دەيىن العاشقى 10 پيلوتتىق جوبانى كورەرمەنگە ۇسىنۋدى كوزدەپ وتىرمىز.

ء"بىز وسى جۇمىستار ارقىلى ۇلتتىق انيماتسيانىڭ باسەكەگە قابىلەتتىلىگىن ارتتىرىپ، ول ونىمدەردى ۇلكەن پروكاتقا شىعارۋدى جوسپارلايمىز. زامان كوشىنەن قالماي، ءبىلىمدى دە بىلىكتى شىعارماشىل جاستارىمىزدى قولداپ، جاڭا يدەيالار مەن تىڭ باستامالارعا ىڭعايلى الاڭ جاساۋىمىز قاجەت. اۋديتوريا سۇرانىسىن قاناعاتتاندىراتىن ساپالى كونتەنت قالىپتاسىرىپ، شەتەلدىك ارىپتەستەرمەن تىعىز بايلانىس نەگىزىندە قازاق انيماتسياسىن حالىقارالىق دارەجەگە كوتەرەمىز دەپ سەنەمىن" دەپ قوستى اباەۆ.

پىكىرلەر