Endi oqýshylar jazǵy demalysqa 1 maýsymda shyǵady - QR Oqý-aǵartý mınıstrligi

1998
Adyrna.kz Telegram

Endi mektep oqýshylary jazǵy demalysqa 1 maýsymda shyǵady. Bul týraly QR Oqý-aǵartý mınıstrligi habarlady , dep jazady "Adyrna" ulttyq portaly. 

Oqý-aǵartý mınıstrligi mamandardyń usynystary men ǵylymı zertteýleriniń nátıjelerine zertteý júrgizdi. Osyǵan deıin mamandar oqý jylyn maýsym aıynyń sońyna deıin uzartý jáne oqý jylyn 20 tamyzdan bastaý máselesin qaraýdy surap, mınıstrlikke birneshe ret júgingen bolatyn.

Sarapshylar Qazaqstan álemdegi eń uzaq kanıkýl - 130 kún bolatyn elderdiń qataryna kiretinin alǵa tartty. Al basqa da elderde kanıkýl merzimi 80-nen 100 kúnge deıin. Sonymen qatar 5 kúndik oqý aptasyna kóshken kezde oqý kúnderiniń sany birden 34 kúnge azaıdy. Osylaısha, orta eseppen alǵanda, bizdiń elimizdegi oqý kúnderiniń jalpy sany shamamen 150 kún bolsa, damyǵan elderde bul shamamen 200 kún. Sondaı-aq mamandar qosymsha oqý aptalarynyń qosylýy kúndelikti sabaqtyń sanyn, ıaǵnı muǵalimniń de, oqýshynyń da kúndelikti oqý júktemesin azaıtatynyn atap ótti. Alty kúndik kóptegen mektep jańa talapqa saı bes kúndik oqý aptasyna aýysa alady. Bul pedagogter jumysynyń tıimdiligin arttyryp, oqýshylardyń materıaldy meńgerýine yqpal etedi. Bul sheshimder kúrdeli taqyryptardy oqýdyń qarqynyn tómendetedi, oqylǵan materıaldy qaıtalaýǵa jáne bekitýge ýaqyt beredi.

Bul rette ózgerister jazǵy demalysqa áser etpeıtinin túsiný mańyzdy. Iaǵnı balalar 1 maýsym men 1 qyrkúıek aralyǵynda demalady.

«Oqý jylyn uzartýdy qoldaýshylar 4-toqsandy 20-25 maýsymǵa deıin sozýdy jáne oqýdy 20 tamyzdan bastaýdy usynyp otyr. Mamandar birneshe jyldan beri dabyl qaǵyp, oqýshylarymyzdyń jazǵy ýaqyttaryn kompıýter men smartfondarda oıyn oınaýmen ótkizip jatqanda, olardyń qatarlastary bilim alyp, oqyp jatqanyn aıtyp keledi. Olar buǵan deıin de óz dálelderin keltirgen bolatyn. Biz ǵalymdar, psıhologtar, ata-analar men pedagogterden quralǵan jumys tobyn qurdyq. Halyqaralyq tájirıbe de zerdelendi. Jumys toby mamandardyń usynystaryn qoldamaı, balamaly usynys engizdi: oqý jylynyń bastalý merzimin ózgertpeı, ony burynǵydaı 1 qyrkúıekte qaldyrý, al oqý jylynyń aıaqtalý merzimin 31 mamyrǵa belgileý. Osylaısha, kanıkýlǵa shyǵýdyń aıyrmashylyǵy nebári 5 kún bolady. Al jaz bastalǵanda, ıaǵnı 1 maýsymnan bastap balalar demalysqa shyǵa alady. Osylaısha, jaz boıy, ıaǵnı 1 maýsym men 1 qyrkúıek aralyǵynda balalar kanıkýlda bolady. Bul oraıda biz sapany tek oqý kúnderi arqyly ǵana emes, jalpy oqý júktemesin azaıtý, oqý baǵdarlamalaryn jetildirý, mamandardyń biliktiligin arttyrý jáne t.b. joldar arqyly jaqsartamyz. Sondaı-aq, jańa oqý jylynan bastap mektepterde aptalyq oqý júktemesin azaıtý josparlanyp otyr. Odan bólek, oqý jylynyń uzaqtyǵyn sozý oqýshylarǵa qosymsha bilimge kóbirek ýaqyt bólýge múmkindik beredi, óıtkeni sabaq az bolady, mektepterdiń kabınet qoryna túsetin júkteme de azaıady», - dedi Mektepke deıingi jáne orta bilim komıteti tóraǵasy Gúlmıra Kárimova.

Salystyrmaly túrde alyp qaraıtyn bolsaq, Germanııa, Anglııa jáne Japonııada jazǵy demalys 7 apta, Polsha, Qytaı jáne Ońtústik Koreıada 7-9 apta, Fınlıandııa, Vengrııa, Shveııada 9-11 apta, Latvııa, Italııa jáne Portýgalııada 11 apta, Qazaqstanda - 14 aptaǵa sozylady.

"Adyrna" ulttyq portaly 

Pikirler