Qazaqstan men Resei atom elektr stansiiasyn (AES) salu boiynşa indikativtı jol kartasyn bekıttı, dep habarlaidy "Adyrna" ūlttyq portaly.
Būl turaly Atom energiiasy jönındegı agenttıktıŋ baspasöz qyzmetı mälımdedı.
«2025 jylǧy 20 mausymda Sankt-Peterburg halyqaralyq ekonomikalyq forumynyŋ aiasynda Qazaqstan Respublikasy Atom energiiasy jönındegı agenttıgınıŋ basşysy Almasadam Sätqaliev pen Reseidıŋ «Rosatom» memlekettık korporasiiasynyŋ bas direktory Aleksei Lihachev Qazaqstan Respublikasynda atom elektr stansiiasyn salu jobasyn jüzege asyru mäselelerı boiynşa kezdestı. Kezdesu barysynda injenerlık-ızdestıru jūmystaryn jürgızudı, EPC-kelısımşart jasaudy jäne jobalyq qūjattamany äzırleudı qamtityn jobany daiyndau men jüzege asyru kezeŋderın qarastyratyn İndikativtı jol kartasy bekıtıldı», – delıngen habarlamada.
Sonymen qatar, «Qazaqstandyq atom elektr stansiialary» JŞS men «Atomstroieksport» AQ (RF «Rosatom» memlekettık korporasiiasynyŋ injiniringtık kompaniiasy) arasynda Almaty oblysy Jambyl audanyndaǧy jobany ıske asyru boiynşa yntymaqtastyqtyŋ negızgı qaǧidalaryn aiqyndaityn negızdemelık kelısımge qol qoiyldy.
Agenttıktıŋ mälımdeuınşe, būl strategiialyq joba – beibıt maqsattaǧy atom energiiasyn paidalanu salasyndaǧy memleketaralyq yntymaqtastyq aiasynda jüzege asyrylady jäne Qazaqstannyŋ energetikalyq qauıpsızdıgın qamtamasyz etu men el ekonomikasyn dekarbonizasiialauǧa baǧyttalǧan strategiialyq maqsattardy közdeidı.
Taraptar Qazaqstan üşın strategiialyq maŋyzǧa ie būl jobany jüzege asyrudy jedel bastau qajettıgın atap öttı.
«Qazaqstan tarapynyŋ elımızde atom stansiiasyn salatyn halyqaralyq konsorsiumdy basqarudy bızge senıp tapsyrǧanyna rizamyz. Qazaqstan – atom salasyndaǧy senımdı tarihi serıktesımız. Reseilık iadrolyq tehnologiialar özınıŋ senımdılıgımen, qauıpsızdıgımen jäne tiımdılıgımen däleldengen, olar Qazaqstan halqynyŋ igılıgıne jūmys ıstep, eldıŋ energetikalyq egemendıgın nyǧaitady dep senemız», – dedı Aleksei Lihachev.
Al Qazaqstan tarapynyŋ basşysy Almasadam Sätqalievtıŋ aituynşa, elde atom stansiiasyn salu – energetika salasyn tūraqty damytuǧa baǧyttalǧan keşendı strategiianyŋ bır bölıgı.
Aita keteiık, 14 mausymda Qazaqstandaǧy alǧaşqy AES-tı reseilık «Rosatom» memlekettık korporasiiasy salatyny belgılı boldy. Al ekınşı AES-tı salu üşın qytailyq kompaniianyŋ ūsynysy qaralyp jatyr. Atom energiiasy jönındegı agenttık ökılderınıŋ aituynşa, «Rosatom» salyp jatqan alǧaşqy AES-ke qatysty batys sanksiialarynyŋ äserı bolmaidy. Bırınşı AES-tı salu merzımı – 10–12 jyl.
