Äleumettık jelıler men messendjerlerde Qazaqstan azamattaryna 1949–2010 jyldar aralyǧynda tuǧany üşın 70 myŋ teŋge kölemınde tölem qarastyrylǧany turaly aqparat tarap jatyr. Alaida būl mälımet şyndyqqa janaspaidy, dep habarlaidy "Adyrna" ūlttyq portaly.
Būl turaly eŋbek jäne halyqty äleumettık qorǧau ministrlıgı mälımdegen.
Vedomstvonyŋ habarlauynşa, belgısız tūlǧalar azamattarǧa sılteme arqyly ötıp, jeke derekterın engızudı ūsynyp, jalǧan uäde berude.
"Äleumettık jelıler men messendjerlerde taralǧan būl aqparat şyndyqqa säikes kelmeidı. Mūndai äleumettık kömek türı müldem joq. Sılteme arqyly ötu — alaiaqtardyŋ jeke aqparatty ūrlauyna jol aşuy mümkın", — delıngen ministrlık mälımdemesınde.
Ministrlık azamattarǧa tek resmi derekközderge senudı jäne beitanys sıltemelerge ötpeudı eskerttı.
"Memlekettık qoldauǧa qatysty resmi aqparat tek 1414 qysqa nömırınen SMS-habarlama arqyly jıberıledı. Jalǧan aqparat taratu zaŋmen jazalanady", — dep eskerttı eŋbek jäne halyqty äleumettık qorǧau ministrlıgı.
