Polşada Qazaqstan elşılıgındegı äskeri attaşenıŋ kömekşısı ūstaldy. Būl turaly bügın Qorǧanys ministrlıgınıŋ Halyqaralyq qatynastar ortalyǧy aitty, dep habarlaidy «Adyrna» tılşısı.
«Polşa qūqyq qorǧau organdarynyŋ qazaqstandyq äskeri attaşenıŋ apparat qyzmetkerın ūstau faktısın rastaimyz. Qazırgı uaqytta būl jaǧdaidy şeşu üşın şeteldık tarappen özara ıs-qimyl jasaluda. Sondai-aq Qazaqstan Respublikasy azamatynyŋ qūqyqtary men zaŋdy müddelerın qorǧau boiynşa qajettı şaralar qabyldanuda»,-delıngen habarlamada.
30 şıldede Polşa bilıgı Bydgoş qalasynda Ortalyq Aziia elderınıŋ bırınıŋ syrtqy barlau qyzmetınıŋ ofiserı ūstalyp, üş aiǧa qamauǧa alynǧanyn mälımdedı. Bıraq naqty qai eldıŋ azamaty ekenı aitylmady. Al jaqynda bırqatar BAQ-ta Polşada Qazaqstannyŋ äskeri attaşesınıŋ kömekşısı tyŋşylyq jasady degen küdıkpen tūtqyndaldy degen aqparat tarady.
