Memleket basşysy Qasym-Jomart Toqaev Qyrǧyz Respublikasynyŋ prezidentı Sadyr Japarovty "Altyn Qyran" ordenımen marapattady. Būl turaly Aqorda jazdy, dep habarlaidy “Adyrna”.
Qasym-Jomart Toqaev marapattau räsımınde Sadyr Japarovty qyrǧyz halqyn alǧa bastap kele jatqan naǧyz köşbasşy, bılıktı saiasatker dep bıletının aitty.
"Qyrǧyzstandy körkeitu jolyndaǧy qajyrly eŋbegıŋızdı joǧary baǧalaimyz. Saliqaly saiasatyŋyzdyŋ arqasynda elıŋız damudyŋ jaŋa kezeŋıne qadam basty. Qyrǧyz ekonomikasy joǧary qarqynmen damyp keledı" , – degen Toqaev qyrǧyz jūrty būdan da biık belesterdı baǧyndyra beretınıne senım bıldırdı.
Memleket basşysy Qazaqstanda bır tuǧan bauyrlas el retınde Qyrǧyzstannyŋ barlyq jetıstıkterıne şyn jürekten quanatynyn jetkızdı.
"Sız qyrǧyz elın örkendetu jolynda tabandy eŋbek etıp, halqyŋyzǧa adal qyzmet etıp kelesız. Sondai-aq halyqtarymyz arasyndaǧy dostyq qarym-qatynasty nyǧaita tüsuge orasan zor eŋbek sıŋırıp jatsyz. Mūny barşa qazaq jūrty jaqsy bıledı. Osyǧan orai, men Sızdı Qazaqstan Respublikasynyŋ eŋ joǧary memlekettık nagradasy – "Altyn Qyran" ordenımen marapattau turaly şeşım qabyldadym. Būl nagrada – Qazaq elınıŋ Sızge jäne bükıl qyrǧyz halqyna degen erekşe qūrmetı men şynaiy alǧysynyŋ riiasyz belgısı, – dedı prezident.
Sadyr Japarov Qazaqstan Respublikasynyŋ joǧary memlekettık nagradasymen marapattaǧany üşın Qasym-Jomart Toqaevqa jäne qazaq halqyna alǧys aityp, mūny Qyrǧyz elıne körsetılgen syi-qūrmettıŋ belgısı retınde qabyl alǧanyn jetkızdı. Sondai-aq būl ekı eldıŋ strategiialyq serıktestıgı men odaqtastyǧynyŋ joǧary deŋgeiın aiqyndaitynyn atap ötıp, uaqyttyŋ barlyq synynan ötken yntymaqtastyqtyŋ aldaǧy kezeŋde de nyǧaia beretınıne senım bıldırdı.
