Qazaqstan prezidentı Qasym-Jomart Toqaevtyŋ Qyrǧyz Respublikasyna resmi sapary aiaqtaldy, dep habarlaidy “Adyrna”.
Aqordanyŋ habarlauynşa, halyqaralyq Manas äuejaiynan Memleket basşysy Qasym-Jomart Toqaevty Qyrǧyzstan prezidentı Sadyr Japarov qūrmetpen şyǧaryp saldy.
Qasym-Jomart Toqaev resmi saparmen Qyrǧyzstanǧa 2025 jyly 21 tamyzda bardy. Memleket basşysyn äuejaidan Sadyr Japarovtyŋ özı qarsy aldy.
22 tamyzda Qasym-Jomart Toqaev pen Sadyr Japarov Qazaqstan men Qyrǧyzstan Joǧary memleketaralyq keŋesınıŋ otyrysyna qatysty.
Memleket basşysy Qyrǧyzstan Prezidentınıŋ ekıjaqty yqpaldastyqty jaŋa deŋgeige köteruge zor üles qosqanyna nazar audardy.
– Men mūny joǧary baǧalaimyn. Qajyrly eŋbegıŋızdıŋ arqasynda Qyrǧyzstanda köptegen oŋ özgerıs bolyp jatyr. Sız halyqtyŋ äl-auqatyn jaqsartudy közdeitın maŋyzdy bastamalardy jüzege asyryp kelesız. El ekonomikasynyŋ jyl basynan berı 11,7 paiyzǧa ösuı – osynyŋ aiqyn dälelı. Bız bauyrlas eldıŋ barlyq jetıstıkterıne quanamyz. Qyrǧyzstanmen aradaǧy yntymaqtastyqty barynşa nyǧaituǧa airyqşa män beremız, – dedı Memleket basşysy.
Sadyr Japarov şaqyruyn qabyl alyp, Qyrǧyzstanǧa resmi saparmen kelgenı üşın Qazaqstan Prezidentıne rizaşylyǧyn jetkızdı.
– Sızdı Qyrǧyzstanda körnektı memleket qairatkerı jäne halyqaralyq deŋgeidegı täjıribelı diplomat retınde bıledı. Soŋǧy jyldary Sızdıŋ qoldauyŋyzben ekı eldıŋ qarym-qatynasy jaŋa deŋgeige ötıp, dostyǧymyz ben bauyrlastyǧymyzdyŋ bekemdele tüsuı bızdı quantady. Qazaq elı – bız üşın erekşe el. Bızdıŋ mämılelerımız Toqtoǧūl men Abaidai, Şyŋǧys pen Mūhtardai atalarymyz salǧan ızbenen jalǧasqan. Tarihi mūramyzdy ūmytpai, keleşek buynǧa jetkızudı negızgı maqsatymyz dep esepteimın. Öz tarapymnan özara qarym-qatynasymyzdy odan ärı ılgerıletuge daiynmyn. Bızdıŋ negızgı küşımız – ekı eldıŋ yntymaǧy men bırlıgı, – dedı Qyrǧyzstan Prezidentı.
Būdan bölek, kelıssöz barysynda taraptar saiasi, kölık-tranzit, su, agrarlyq jäne sifrlandyru salalaryndaǧy yqpaldastyqty nyǧaitu mäselelerın talqylady. Mädeni-gumanitarlyq bailanystardy örıstetuge erekşe män berıldı. Sonymen qatar öŋırlık jäne halyqaralyq kün tärtıbı qarastyryldy.
Keiınnen Qazaqstan men Qyrǧyzstan memleketterı basşylarynyŋ Bırlesken mälımdemesı qabyldandy.
Prezident Sadyr Japarovty "Altyn Qyran" ordenımen marapattady.
Sonymen qatar Qasym-Jomart Toqaev pen Sadyr Japarov baspasöz brifingın ötkızdı.
Būdan bölek Qasym-Jomart Toqaev Qyrǧyzstannyŋ bırqatar memleket jäne qoǧam qairatkerın marapattady.
Sondai-aq Toqaev pen Japarov "Dostyqtyŋ altyn köpırı" eskertkışınıŋ aşylu räsımıne qatysty.
Odan bölek, Memleket basşysy Kemel Toqaev atyndaǧy №33 mektep-gimnaziiasyna bardy.
