Qazaqstannyŋ belgılı publisistı, jazuşy, qoǧam qairatkerı Qaiym-Mūnar Tabeev dünieden öttı, dep habarlaidy "Adyrna" ūlttyq portaly.
Qaraly habardy jazuşy ärı jurnalist Talǧat Aitbai äleumettık jelıde rastady.
"Osydan bır saǧat būryn Roza Seiılhanqyzy telefon şaldy.
“Jedelhan zvondady. Jylap tūr. Altynymnan aiyrylyp qaldym deidı. Ol kım deuge de keltırmedı. Erkındı sūrady” deidı.
Töbemnen jai tüskendei bolyp Erkınge habarlastym. Äuelı Odaqqa habar keler edı ǧoi,- deidı ol.
Qainar da äbırjıdı. Ol da estımegen...
Ne bolsa da. Özınıŋ telefonyna soǧyp köreiın, bälkım bıreuı köterıp qalar degen oiymnan da eşteŋe şyqpady.
Mıne, Ūlbosyn Aitölen rastady. Jylap tūr. Jedelhan Erkınnıŋ telefonyn sūrap jatyr deidı.
Ne kerek, jaman habar rastaldy.
Qazaq ädebietı bır sarbazynan aiyryldy…
Qaiymmūnar Tabei baqilyq jolyna tüsıptı.
Ötken jyly ana jaqqa barmasa da, barǧandai bolyp kelıp pdı. Qairan ärıptes, kurstas dos, aldyŋda bas iemız. Sen elge kerek, älı de jūmbaǧy köp Jeltoqsan jönınde jazaryŋ qisapsyz qalamger edıŋ…
Otbasy, aǧaiyndaryna köŋıl aitu sözı bolsyn, basqa jūrt bılsın dep jazyp otyrmyn", - dep jazba jariialady Talǧat Aitbai.
Qaiym-Mūnar Tabei 1956 jyly 5 mamyrda Aiagöz audanyndaǧy düniege kelgen. 1981 jyly Äl-Farabi atyndaǧy Qazaq memlekettık universitetınıŋ jurnalistika fakultetın tämamdaǧan. Keiın Qazaq memlekettık Zaŋ universitetınde, Almaty memlekettık basqaru institutynda jäne QR Prezidentı janyndaǧy memlekettık qyzmet akademiiasynda bılımın jalǧastyrǧan.
Ol jurnalistika salasynda «Qazaqstan pionerı» («Ūlan»), «Leninşıl jas» («Jas Alaş»), «Qazaq ädebietı», «Egemen Qazaqstan» gazetterınde eŋbek ettı. Är jyldary Qazaqstan Prezidentı baspasöz qyzmetınde, QR Baspasöz jäne būqaralyq aqparat ministrlıgınde, Almaty qalasy äkımdıgınıŋ ışkı saiasat jäne tıl basqarmasynda, sondai-aq Qazaqstan halqy Assambleiasynyŋ hatşylyǧynda jauapty qyzmetter atqardy.
Qaiym-Mūnar Tabeev Jeltoqsan oqiǧasy turaly alǧaşqylardyŋ bırı bolyp baspasözde maqala jariialaǧan qalamger retınde belgılı. Ol 1986 jylǧy Jeltoqsandy oqiǧa emes, «köterılıs» dep baǧalap, jastardyŋ "basty talaby" elde ana tılınde söileu jäne bılım alu qūqyǧy ekenın aşyq aitqan.
