Qazaqstannyŋ halyq ärtısı Roza Rymbaeva Jaŋaözen, Qaŋtar oqiǧalaryna qatysty pıkır bıldırdı, dep habarlaidy «Adyrna» tılşısı.
Ol jurnalist Qanat Tıleuhanǧa bergen sūqbatynda halyqtyŋ erıkkennen alaŋǧa şyqpaitynyn atap öttı.
«Olar bırınşı özınıŋ mekemesınde aitady. Ol mekeme tyŋdamaǧannan keiın mūnai basşylyǧyna barady. Olar tyŋdamaǧan soŋ alaŋǧa şyǧady. Ol bolmaǧan soŋ Astanaǧa kelıp aitady. Sonda tyŋdauşy Ükımet qaida? Bärın estıp, bılıp otyr. Mende sondai sūraq tuyndaidy. Erıkkennen eşkım şyqpaidy. Halyq ädıletsızdık bolǧan soŋ şyǧady. Ol jerde qarapaiym eŋbek adamdary şyǧyp jatyr. Sol jerde jūmys ıstep jatqandar, syrttan kelgender emes»,—dedı ol.
Eske salaiyq, 2022 jyldyŋ qaŋtarynda Maŋǧystau oblysynda sūiyltylǧan gazdyŋ qymbattauyna qarsy narazylyq bastalǧan bolatyn. Keiın ereuıl tūtas Qazaqstandy jailady. Bastapqyda beibıt bastalǧan narazylyq şaralary artynan qaruly qaqtyǧystar men tonauşylyqqa tonauşylyqqa ūlasty. 5 qaŋtarda bastalǧan tärtıpsızdıkter resmi deŋgeide memlekettık töŋkerıs dep ataldy.
Eldegı jaǧdaidyŋ şielenısuıne bailanysty, 5 qaŋtarda tötenşe jaǧdai Qazaqstannyŋ barlyq aumaǧynda engızıldı. Şeruşıler maŋyzdy nysandarǧa şabuyl jasap, Almaty, Taldyqorǧan qalalaryndaǧy äkımdık ǧimarattary, Almaty äuejaiy narazy halyqtyŋ qolyna öttı. Artynşa Qasym-Jomart Toqaev Ūjymdyq qauıpsızdık turaly şart ūiymy basşylarynan kömek sūraǧanyn mälımdedı. 10 qaŋtarda ŪQK tärtıpsızdıkter kezınde basyp alynǧan barlyq äkımşılık nysandardyŋ qaitarylǧanyn, eldegı jaǧdaidyŋ tūraqtalǧanyn mälımdedı. 11 qaŋtarǧa deiın tärtıpsızdıkke qatysyp, qamauǧa alynǧan adamdardyŋ sany 10 myŋǧa juyqtady. Tonauşylyq pen būzaqylyqtyŋ saldarynan käsıpkerlerge keltırılgen şyǧynnyŋ mölşerı 100 milliard teŋgeden asty.
