Qazaqstanda Atom elektr stansiiasyn (AES) saluǧa qarsy şyqqan bes belsendınıŋ jazasy qysqartyldy. Degenmen, apelliasiialyq sot olardyŋ tolyq aqtalu turaly ötınışın qanaǧattandyrmady. Būl turaly KazTAG agenttıgı jazdy, dep habarlaidy «Adyrna».
Almaty qalalyq apelliasiialyq sotynyŋ şeşımımen Nūrlan Temırǧaliev, Janat Qazaqbai, Nūrlan Jauylbaev, Aidar Mūbarakov jäne Fazyljan Sydyqovtyŋ jazasy tört jyldan ekı jarym jylǧa deiın jeŋıldetıldı..
Belsendıler özderın kınälı dep sanamai, sot ükımın saiasi astary bar dep ataǧan. Olar alǧaşqy sot ükımıne şaǧym tüsırıp, aqtaudy talap etken edı.
Alaida sot olardyŋ uäjderın qabyldamai, tek jaza merzımın qysqartumen şekteldı. Belsendılerdıŋ qorǧauşylary būl şeşımmen kelıspeitının aityp, kassasiialyq şaǧym tüsıretınderın mälımdedı.
Belsendıler byltyr AES salu turaly referendum qarsaŋynda ūstalǧan bolatyn. Tergeu nūsqasy boiynşa, olar AES qūrylysyna qarsy paraqşalar taratyp, jinalystar ūiymdastyrǧan. Prokuratura olardy «jappai tärtıpsızdık ūiymdastyruǧa daiyndaldy» dep aiyptady.
2024 jyldyŋ tamyzynda Almaly audandyq soty olardy tört jylǧa bostandyǧyn şekteu jazasyna kesıp, bes jyl boiy qoǧamdyq qyzmetpen ainalysuǧa tyiym salǧan.
Belsendıler būl ıstı saiasi quǧyn dep baǧalaǧan.
Oqiǧa halyqaralyq deŋgeide de nazar audartty. Amnesty International ūiymy Qazaqstandaǧy adam qūqyqtary jönındegı esebınde būl jaǧdaidy atap öttı. Ūiym mälımetınşe, 2024 jyldyŋ qazan aiynda polisiia AES saluǧa qarsy beibıt aksiia ötkızudı josparlaǧan 12 belsendını tūtqyndaǧan. Olarǧa da «jappai tärtıpsızdıkke daiyndalu» baby boiynşa aiyp taǧylǧan.
