Bügıngı künı zaman talabyna sai erekşe ülgıde qoldan tıgılgen ūlttyq kiımder ülken sūranysqa ie. Könenıŋ közın qaita jaŋǧyrtyp, qazaqtyŋ zamanaui ūlttyq beinesın qalyptastyramyn dep aldyna zor maqsat qoiyp, soǧan jetu jolynda talmai talaptanyp jürgen «MadinaQuandyQ» şyǧarmaşylyq studiiasynyŋ iesı, «Qapsyrma» ūlttyq kiımdı nasihattau jobasynyŋ avtory – Madina Quandyqqyzyn oqyrmandarymyzben keŋırek tanystyrudy jön kördık. Madina Quandyq – etnodizainer, konstruktor-pışuşı ärı köpbalaly äleumettık käsıpker. Ol köpbalaly jäne äleumettık toptaǧy analarǧa tıgın tıgudı tegın üiretıp, öz käsıpterın aşuǧa qoldau körsetıp, ūlttyq qolönerge ekınşı tynys berıp jür.
ÄKENIŊ QANYMEN, ANANYŊ AQ SÜTIMEN DARYǦAN QOLÖNER
Es bılgelı qolönerge jaqyn bolyp östık. Äkem jaǧynan ülken äjem qūraqşy bolǧan. Äjem on sausaǧynan bal tamǧan ısmer, atam at äbzelderın jasaǧan ūsta boldy. Naǧaşy äjem tıgınşı edı. Anamyz – suretşı, syzu, eŋbek pänınıŋ mūǧalımı. Bala künımızden bızge kiım tıgıp beretın. Oiu ülgısın jasaudy osy anamnan üirendım. Qolymyzǧa qaǧaz, qaişy alyp oiu oiyp otyratyn edık. Qoidy da özımız qyrqatynbyz. Jünın juyp, tütıp, ūrşyqpen iırıp, mata toqitynbyz. Kiımderdıŋ barlyǧyn osylai qoldan tıgetın edık... Būl maǧan jat närse emes. Qazır köbı mentor, nastavnik degendı tauyp alyp, YouTube-tan qarap, arnaiy kurstarǧa baryp, kıtaptan oqyp jatady. Kışkentaiymyzdan osynyŋ bärın körıp öskendıkten bolar, qolöner janyma erekşe jaqyn boldy. Basqa mamandyq turaly oilamadym da...
SÜIIKTI ISIM KÄSIBIME AINALDY
2000 jyly 9-synypty bıtıre sala, elordaǧa kelıp Tehnologiialyq kolledjge «Tıgın öndırısı jäne kiımderdı ülgıleu» mamandyǧyna oquǧa tüsıp, 2003 jyly tämämdadym. Ol jerden käsıbi türde bılım alyp, modeler-konstruktor, pışuşı, tıgınşı universal bolyp şyqtym. Bır orynda toqtap qalmai, alǧan bılımımdı ary qarai damytamyn dep şeştım. Haute couture, nemıs, italiandyq, neopalitandyq t.b. tıgın tıgu tehnologiialaryn meŋgerdım. Alǧaşqy eŋbek jolymdy osydan 20 jyl būryn "Kovaleva Sän üiınde" bastap, belgılı modeler-konstruktor Nina Kovalevamen bırlesıp jūmys ıstedım.
Eŋ alǧaşqy taqiialarymdy sol jaqta tıkken edım. Būryn menıŋ atam sol taqiiany tastamai «Menıŋ nemerem tıktı» dep maqtanyp kiıp jüretın edı. Qazır endı özım «Menıŋ qolymnan şyqqan dünienı atam kidı» dep maqtanyp jürmın...
Odan keiıngı jyldary elımızge belgılı dizainerler - Dinara Satjan, Nail Baikuchukovtıŋ komandasynda jūmys ıstep, täjıribe almastym.
ŪLTTYQ KİIMDI KÜNDELIKTI TASTAMAI KİEMIN
Ūlttyq kiımdı kündelıktı ömırde kiıp jüru maǧan taŋsyq emes. Äjelerımız, analarymyz barlyǧy köz aldymyzda osylai kiınıp jüretın edı... Älı esımde, qazaqşa kiımdı özıme tıgıp, kiıp jürgen kezderımde köbısı menen «qaidan aldyŋ» dep sūraǧan saiyn «özım tıktım» dep emes, «äpkem satyp alyp berdı» dep aitatynmyn. Sebebı, ol kezde «qoldan tıgılgen kiım halyqqa qyzyq emes, qolöner älı damyǧan joq» dep oilaitynmyn.
Sodan uaqyt öte kele köpşılık artymnan qalmai, «osyndai ädemı kiımderdı qaidan aldyŋ» dep qoimaǧasyn «özım tıktım» dep aita bastadym... Söitıp qazaqşa kiımge sūranys köbeidı. Adamdarǧa arnaiy tıge bastadym. Klientter de osylai jinaldy. Qoldan tıgılgen kiım dükendegı daiyn kiımderge qaraǧanda äldeqaida qymbat bolsa da, halqymyzdyŋ ūlttyq kiımge degen qyzyǧuşylyǧynyŋ bar ekenın jäne ol künnen-künge ösıp kele jatqanyn baiqadym.
ŪLTTYQ KİIMDERIMIZBEN MAQTANUYMYZ KEREK
Taqiiany basymnan tastamai, qamzol, köilegımdı kiıp, ūlttyq kiımderımızdı ne sebeptı tıgıp, nasihattap jürsız deisız ǧoi... Qazaqtyŋ iısı müŋkıp tūruy kerek. Bızdı syrttan körgender qazaq ekenımızdı bılıp tūruy kerek. Şetelge şyqqan kezde de ünemı qazaqşa kiınıp jüremın. Barlyǧy «This is Kazakhstan!» dep taŋǧalyp, baǧalap jatady. Şynymen bız öz ūlttyq kiımderımızben maqtanuymyz kerek. Būl maqtanuǧa tūrarlyq närse.
Būrynǧy kezdıŋ kiımderın qarasaŋyzdar... Grekter te, ündıler de, orystar da oranyp kiıngen. Al bızdıŋ ata-babamyz atty da qolǧa üiretken, kiımdı de jeke-jeke kigen. Atqa mınuge yŋǧaily bolsyn dep şalbardy da oilap tapqan. Etıkşıler de bızden şyqqan eken. Qazaqtar osyny şyǧardy dep orys şyǧystanuşylary da öz eŋbekterınde jazyp, däleldep ketken.
ŪLTTYQ KİIM TIGUDI ÜIRENGISI KELETIN QYZ-KELINŞEKTER ÖTE KÖP
Osydan 5 jyl būryn maǧan «Sızdıŋ qolyŋyzdan şyqqan kiım üstımızde ädemı tūrady jäne tıgılgenı de körınbeidı. Tura dükennen satyp alǧandai, bızge bar bıletınıŋızdı üiretıŋızşı» dep adamdar kele bastady. Sol kezderı jalǧa alǧan ofistıŋ ışı tar bolǧandyqtan tek 1-2 oquşydan alyp otyrdym. Mıne, qazır 10-25-ke juyq adamǧa tıgınşılıktı üiretıp, ūstazdyq etıp jürmın.
Qolöner adamdardyŋ sūranysynda bar. Barlyǧy tek ūlttyq kiım tıgudı ǧana emes, sondai-aq ūlttyq dästürdı ūstanǧysy keledı. «Sız, Qazaq elınde naǧyz qazaqqa tän ūlttyq tärbienı saqtap qalǧansyz. Būny bır jerden oqyp alyp, ne bolmasa jattap alyp, aityp jürgen joqsyz. Äkenıŋ qanymen, ananyŋ sütımen daryǧan qolöner taqyryby boiynşa bızge därıs oqysaŋyz, sızdıŋ därısterıŋızdı tyŋdaǧymyz keledı» degen sūranys köbeigesın ūstazdyqty da qolǧa aldym.
KİIM TIGERDE ARNAIY AFFİRMASİIа AITAMYN
Bız ejelden söz qadırın ūǧynǧan dana halyqpyz ǧoi. «Batamen el kögerer», «Jaqsy söz jarym yrys» degenge sengen qazaq halqy batany igı jaqsylyq pen sättılıktıŋ bastauy dep, oǧan tereŋ män bergen. Bala künımızden ata-äjelerımızdıŋ auzynan «Kösegeŋ kögersın», «Örkenıŋ össın», «Alla abyroi bersın» degen ızgı tılekterdı estıp östık. Bır-bırımızge qarǧys emes, tek qana alǧys aitaiyqşy dep, özım de klientterdıŋ kiımın tıgıp otyryp «Osy kısınıŋ joly aşylsyn! Qatarynyŋ aldy bolsyn! Jūldyzy joǧary bolsyn!» dep şyn jüregımmen aq tılegımdı arnaimyn. Äruaqtarǧa arnap jetı şelpektı ilegende de, bükıl äruaqtardy aityp ileimız ǧoi. Sol siiaqty men kiım tıkken kezde de osynyŋ barlyǧyn aita bastadym.
Bügıngı tılmen aitqanda affirmasiia deidı ǧoi. Klientterım qaityp kelgen saiyn maǧan «Osy sızdıŋ qolyŋyzdan şyqqan myna pidjakty kisem, men osyndai osyndai kelısım-şarttarǧa otyramyn, osyndai osyndai belesterdı baǧyndyrdym» dep alǧystaryn jaudyrady. Anamnyŋ aituynşa, bızdıŋ ata-babalarymyz da kiım tıgerde batasyn aityp tıkken. Mysaly, atamnyŋ kiımınıŋ ışınde qyzyl jıp ne üşın tıgılgen dep sūraǧanymda, «köz timesın» dep jauap bergen edı. Bylai qarasaŋyz, osynyŋ barlyǧynda ülken ideia, tyŋ filosofiia jatyr. Qazaqtyŋ jäidan-jäi ıstei salǧan närsesı joq. Än aitsa da, tamaq pısırse de, kiım tıkse de – ar jaǧynda filosofiia tūrady.
ÄR OIý-ÖRNEKTIŊ MAǦYNASY BAR, ORYNSYZ QOLDANUǦA BOLMAIDY
Mysaly, qazaq älıpbiınde 42 ärıp bar. Osy 42 ärıptıŋ kömegımen jurnalist, aqyndar ülken bır poemalar, esseler jazasyzdar, poeziialar şyǧady. Änşılerdı qarasaq, 7-aq nota bar. Sol 7 notadan keremet änder, jyrlar şyǧarady. Ülken bır kompozisiialar düniege keledı. Sol siiaqty bızdıŋ qolönerşıler de tüsterdı almastyra otyryp, basqa tüs alady. Bızdıŋ oiu-örnek tek 4-aq türge bölınedı. Ol kosmogoniialyq, ösımdık tektes, zoomorftyq jäne geometriialyq örnek. Bıraq bız osydan qanşama keremet dünieler şyǧaramyz.
Bıraq, är oiudyŋ tereŋ maǧynasyna üŋılmei, oŋdy-soldy orynsyz qoldanuǧa da bolmaidy. Mysaly, etıkke «qoşqar müiızdı» tüsıruge bolmaidy. «Bıtpes» oiuy – ol senıŋ ūrpaǧyŋ ösıp-örkendesın, ūrpaǧyŋ jalǧassyn degen maǧynany bıldıredı. «İtqūiryq» degen oiudy dūşpandar tabalamasyn dep tek şapannyŋ şetterıne qoldanǧan. «Dūşpandar töbege şyqpasyn» dep ony bas kiımge salmaǧan. Muzeide saqtalǧan Abylai hannyŋ şapanynda itqūiryqtyŋ oiuy bar. Oiular syr şertedı degen bar. Tüsıne bılgen janǧa är oiudyŋ sakraldy maǧynasy bar. Adam ündemei tūrsa da, oiu barlyǧyn aityp tūrady.
TAQİIа TRENDKE AINALYP, ÄLEMDI JAULAIDY
Bızde qazaqtardy tek säukelemen ǧana tanyp jatady ǧoi. Taqiia qazır trendke ainalyp, barlyǧy tıgıp jatyr. Qazaq qyzdarynyŋ bärı taqiia kiıp jür. Er-azamattarymyz da taqiia kiıp jür. Meksikada sombrero, Saud Arabiiada chalma, Fransiiada beret... Nege qazaqtarǧa taqiiamen älemge tanylmasqa? Dūrys tendensiia!
Bızde töbege kietın taqiiany – «Töbetei» dep ataǧan. Orystar «Tiubeteika» dep audaryp alǧan ǧoi. Özbekter törtbūryşty ülgıde tıgedı. Tatarlar men türıkter ortasyn jiyryp tıgedı. Evreiler şaşaqty etıp tıgedı. Bızde «ükılı taqiia» bolǧan jäne ǧalamtordan qarasaŋyzdar, Mäşhür Jüsıp Atamyzdyŋ ükılı taqiiasy älı künge deiın özınıŋ muzeiınde saqtalǧan.
Bız bala kezımızden taqiia kietınbız. Qazır äiel adamdar «taqiia kimedı» dep jatyr. Şynymen äielder taqiia kimegen, bıraq boijetken qyzdar «ükılı taqiia» kigen. Ary qarai boijetken kelın atanyp, oramal tartqan. Būl jerde de ülken filosofiia jatyr. Mysaly, ūzatylyp bara jatqan qalyŋdyq säukele kiedı, kelın oramal tartady, ary qarai jaulyq, qasaba, kimeşek... Aq jaulyqty ana deimız. Bızde bas kiımderdıŋ san aluan türı bar. Ne kiem deseŋ de tabylady.
Qazır men jündı iırıp taqiia jasap jürmın. Mūndaidy bızdıŋ elde tek bır jerden ǧana kördım. Bıraq olar taqiia retınde emes, erlerdıŋ bas kiımı retınde jasap jür. Nege jünnen taqiia jasamasqa? dep oiladym.
TAQİIаNYŊ BIR ǦANA AVTORY BAR, OL - QAZAQ HALQY
Äleumettık jelıde būryn bırge jūmys ıstegen Janna Bektemısova esımdı qolönerşı «Madina menıŋ taqiia tıgudegı avtorlyq tehnikamdy ūrlap aldy» degen aqparat taratyp jür eken. Halyqtyŋ qolönerın qalai ūrlap aluǧa bolady? Mümkın emes qoi. Mäselenıŋ baiybyna bara bermeitın adamdar şynymen de solai oilap qaluy mümkın. İä, Janna Bektemısovamen bırlese jūmys ıstegenımızde, taqiialardy zyǧyr matadan jasap, qazaqtyŋ oiu-örnegın sala bastaǧanymyz ras.
Bıraq, baiqap qarasaŋyzdar, Japoniia, Malaiziia, Angliia t.b. syndy älem elderı de öz kiımderıne osyndai oiu-örnekter tüsıredı. Būl menıŋ ne bolmasa Jannanyŋ özdıgınen aşqan «jaŋalyǧy» emes. Būl älemde bar täjıribe. Jannanyŋ taqiiany kesteleu tehnikasy «kamlanie şerstiu» dep atalady, al men «zer taqiia», «syryp taqiia», «marjandy» taqiialar tıgemın. Iаǧni eşkımnıŋ eşqandai avtorlyq qūqyǧyn būzyp tūrǧan joqpyn.
Bır aita ketetın jait, qazırgı qolönerşılerdıŋ qolynan şyqqan taqiianyŋ jalǧyz ǧana avtory – ol qazaq halqy. Qolöner – bır ǧana adamǧa tiesılı dünie emes. Ony eşkım eşqaşan özıne iemdenıp ala almaidy. Sondyqtan bız eşkımge «sen ondai taqiia tıkpe» dep şekteu qoia almaimyz. Adam ıstegendı adam ısteidı. Qolöner - būrynnan jalǧasyp kele jatqan ūly dästür, barlyq qazaqqa tän ortaq şyǧarmaşylyq.
Qazır «Ruhani jaŋǧyru» dep jatyrmyz ǧoi. Sol siiaqty bız de qolönerdı damytyp, är türlı tehnika qoldanyp, ıspen «Ruhani jaŋǧyryp» jatyrmyz. Zaman bır orynda tūrmaidy, talǧam özgerıp otyrady. Sol siiaqty Ūlttyq kiımderge de är adam öz qalauynşa basqaşa stil berıp, türlendıre alady, jandandyra alady. Ūlttyq kiımderdı trend retınde ūsynyp, nege zamanaui qazaǧy brend şyǧarmasqa?
QAPSYRMA - JAI ZERGERLIK BŪIYM EMES
Menıŋ özımnıŋ «Qapsyrma» ūlttyq kiımdı nasihattau degen avtorlyq jobam bar. Bıraq, mysaly erteŋ sız qazaqşa kiınıp jürseŋız, men sızge kelıp «Būny tek men ǧana kiiuım kerek», «Men ǧana nasihattauym kerek» dep aita almaimyn ǧoi. Olai ısteuge bolmaidy.
Bala kezımde äjemnıŋ qapsyrmasyn könenıŋ közı dep, özıme mūra retınde alyp qalǧan edım. Keiın 2019 jyly sol qapsyrmany alyp, belbeu retınde özıme tıgıp aldym. Taza kümısten jasalǧan. Qapsyrma jaily ideia osydan tudy. Babadan qalǧan ūly mūramyzdy qaita jaŋǧyrtamyn dep şeştım. Sodan berı elge tanymal belgılı zerger - Berık Älıbaidyŋ qapsyrmalaryn klientterge beldık retınde jasap, bırlesıp jūmys jasap edık.
Qapsyrma - jai zergerlık būiym emes. Maǧynasy tereŋde jatyr. Közden, tılden saqtaidy. Qapsyrma moiynǧa, aiaqqa, qolǧa taǧylmaidy. Tek belde, tek kındık tūsynda tūrady. Qazaq qyzy eşqaşan kındıgın aşyp jürmegen. Kındık qany tamǧan jer, kındıgı üzılmegen dep aityp jatady ǧoi. Beldıktı jasaǧan kezde qapsyrma neǧūrlym ülken bolsa, ol äieldıŋ därejesınıŋ soǧūrlym ülken ekenın bıldırgen. Mysaly, adam öz aldyna kelgen äieldı qapsyrmasyna qarap bılgen. «Därejesı joǧary kelınşek, köpbalaly ana» ekenın sodan bılgen. Sondai-aq, belbeu degen belden tömen auyr syrqattardyŋ aldyn alady. Energiianyŋ bärı jerden keledı, sony joǧary kötermeu üşın bärı belden tömen qalatyndai, aiaqta nyq tūratyndai özındık qasietke ie.
QAZAQ ÄIELINIŊ ZAMANAUİ BEINESIN QALYPTASTYRǦYM KELEDI
Bız qyz-kelınşekterge qazaqşa ūlttyq kiımdı tıgudı üiretken kezde tek «qazaq äielınıŋ garderobymen» şektelmeimız, bız «qazaq äielınıŋ zamanaui beinesın» qalyptastyrǧymyz keledı. Ökınışke qarai, qazırgı qazaq qoǧamy ūlttyq bolmysynan ajyrap, özınıŋ ädet-ǧūrpyn, salt-dästürın ūmytyp, onyŋ ornyna özgenıkın sıŋırıp älek...
Mysaly, būryn üide qonaqtarǧa qyz balalar dastarhan jaiyp jatqan kezde qolynda qūstūmsyq saqinasy bolǧan jaǧdaida ol üige bırden söz salǧan eken. Eger boijetken attastyrylmaǧan bolsa bırden qūda tüsken. Qūstūmsyq saqinasy – "öz erkı özınde", "qyzdyŋ basy bos", "teŋın tappady" degen ūǧymdy bıldırgen. Ekı jas bas qosyp, qūdalar jeke aq otauyn tıgıp, 30 kün oiyn 40 kün toiyn jasaǧannan keiın qyzdyŋ anasy «Myna saqina qaşan artqa keledı» dep qūstūmsyqty kütedı. Eger saqina artqa kelse, tūrmysqa şyqqan qyz sol üide özderınıŋ qyzyndai bolyp ketkenın, ol jaqta oǧan eşqandai qyspaqqa tüspegenın bıldırgen.
Anasy qūdaǧiyna alǧys retınde «qūdaǧi jüzıktı» syilap, özınıŋ analyq alǧysyn aitqan. «Menıŋ qyzym senıŋ üiınde qūl siiaqty emes, kün siiaqty emes, qyzdai bolyp jür eken. Qyzymyzdy öz qyzdaryŋyzdai körgenderıŋızge raqmet» dep qūdaǧi jüzıgın aparyp bergen. Būl da bır keremet dästür. Qazır qūstūmsyqtyŋ män-maǧynasyn bılmei, barlyǧy taǧyp jür ǧoi. «Otaǧasy qaitys bolǧan ǧoi, tūrmysqa şyǧatynyn bıldırıp taǧyp alǧan şyǧar» dep sondai maǧynada oilap qalamyz. Söitsek, ol apalarymyzǧa saqinanyŋ syrtqy formasy ūnap, qyzyǧyp ala salǧan eken. Bırneşe märte sūraǧanymda, köbısı qūstūmsyqtyŋ maǧynasyn bılmeitınıne közım jettı.
Qyz balalardyŋ şaşbauynda da ülken maǧyna jatyr. Mysaly, eger qyz balalar şaşyn ekıge örıp, şaşbau taqsa, onyŋ boijetken ekenın alystan-aq bılgen. Köp närse jürıs-tūrysyna da bailanysty bolǧan. Şaşbauy saldyr-güldır bolsa, mınezı de sondai qyz dep baǧa bergen. Mysaly, er adamdar özderınıŋ arasynda artyq äŋgıme aityp jatsa, şaşbaudyŋ syldyryn esti sala, bırden äŋgımelerın toqtatyp, «Älı tūrmys qūrmaǧan boijetken ondai äŋgıme estımesın» dep äŋgımenı basqa jaqqa būrǧan...
Tūrmysqa şyqqan qyzdar şaştaryn ekıge öredı, bıraq ekeuın ekı bölek jıbermeidı, mıne «men teŋımdı taptym, menıŋ joldasym bar» dep bır ǧana şaşbau taqqan. Äiel adam üiınde er-azamat qaitqan kezde ǧana şaşyn jalbyratyp, jaiyp jürgen. Esık aldynda da şaş jaiyp jüruge bolmaityn edı... «Jaman yrym şaqyryp jatyrsyŋ, baiyŋ öldı me» degendı ülken äjelerımız ünemı aityp otyratyn edı.
KÖPBALALY ANALARǦA TIGIN TIGUDI TEGIN ÜIRETEMIN
Özgeler «taqiia trendte» dep tek paida körıp jatsa, men būdan paida körıp jatqan joqpyn. Qaita «būl taqiiany basqa kelınşekter de üirensın» dep barlyǧyna tegın üiretıp jürmın. Özım köpbalaly ana, äleumettık käsıpker retınde byltyr tıgın sehyn aşu üşın 4 mln teŋge qaitarymsyz grant ūtyp aldym. Memleketten bölıngen qarajatqa tıgın maşinalaryn satyp alyp, köpbalaly analar men äleumettık osal toptarǧa kömek körsetudemız. Üide otyryp qalmai, özderı de osyndai käsıptı döngeletıp jasasyn degen maqsatta tıgınşılıktı üiretetın tegın oqytu kursyn aştyq. Äleumettık käsıpker retınde basqa kelınşekterge öz käsıbın aşuǧa barynşa kömektesemın.
BIZDE ŞİKIZAT BOLMAǦASYN KİIMNIŊ DE BAǦASY QYMBAT
Osylaişa qazaqtyŋ ūlttyq kiımınıŋ qoldanu aiasyn keŋeitıp jatyrmyz. Sebebı, Qyrǧyzstan, Özbekstanda ärbır aulada, är üide barlyǧy ūlttyq kiımdı tastamai kiıp, özderı tıgedı. Ökınışke qarai, bızde şikızat bolmaǧasyn barlyq kerek-jaraqty şetelden äkeluge zärumız. Sol üşın de qoldan tıgılgen kiımderdıŋ baǧasy aspanǧa şaryqtap tūr... Köbıne premium, liuks segmentte tıgemız. İtaliandyq matalardy qoldanamyz. Oǧan tüsınıstıkpen qarauymyz kerek. Bızde şikızat joq. Ne jıp öndırmeimız, ne mata öndırmeimız, ne ine öndırmeimız... Barlyǧy şetelden kelgesın, kiımderdı tegınnen-tegın ūsyna almaimyz. Özınıŋ aqşasyn aqtauy kerek...
Äleumettık käsıpker bolu üşın de, modeler-konstruktor, kiım pışuşı bolu üşın de arnaiy bılım alyp, ızdenıp oqydym. Jünmen dūrys jūmys jasauym üşın Kamila degen ūstazymnyŋ «Kiız basu» kursynan öttım. Barlyq otbasym tıgınşılıkpen ainalyssa da, qolönerge bala künımnen jaqyn össem de, qūraq körpe tıgudı belgılı etnodizainer Yrza Tūrsynzadan üirendım.
Būl jerdegı aitarym, tıgınşılıkpen ainalysu üşın de, jalpy kez-kelgen mamandyqta jetıstıkke jetu üşın ünemı ızdenıste jüru kerek. Sol kezde ǧana belgılı bır jetıstıkterge qol jetkızemız. Oŋai eşnärse joq. Bügın «taqiia trend eken» dep men taqiia tıgeiın, maska tıgeiın dep Iýtubtan qarap, jeŋıl aqşanyŋ soŋynan ketuge bolady. Är närsenıŋ män-maǧynasyn tereŋ tüsınıp, jauapkerşılıktı sezıne bıluımız kerek. Qolöner oinaityn oiynşyq emes...
Äŋgımelesken Zarina ÄŞIRBEK,
"Adyrna" ūlttyq portaly
