AQŞ prezidentı Donald Tramp Resei men Ukraina arasyndaǧy soǧysty toqtatuǧa baǧyttalǧan beibıt jospardyŋ soŋǧy nūsqasyn kelısu üşın arnaiy ökılderın Mäskeu men Kievke jıbergenın mälımdedı. Būl turaly ol Truth Social äleumettık jelısınde jazdy, dep habarlaidy «Adyrna» tılşısı.
Tramp özınıŋ tapsyrmasymen Stiv Uitkofftyŋ Mäskeude Resei prezidentı Vladimir Putinmen kezdesuı tiıs ekenın, al armiia ministrı Den Driskolldyŋ Ukraina ökılderımen kelıssöz jürgızu üşın Kievke attanatynyn aitty.
«Bız vise-prezident Djei Di Venspen, memlekettık hatşy Marko Rubiomen, äskeri ministr Pit Hegsetpen jäne Aq üi äkımşılıgınıŋ basşysy Siuzi Uailspen bırge barlyq progrestı baqylap otyramyz», — dedı AQŞ prezidentı.
Sondai-aq Donald Tramp Ukraina prezidentı Vladimir Zelenskii jäne Resei prezidentı Vladimir Putinmen kezdesuge asyq ekenın aitty. Alaida mūndai kezdesu soǧysty toqtatu jönındegı kelısım tolyq daiyn bolǧanda nemese äzırleu jūmystary soŋǧy kezeŋge jetkende ǧana ötetının atap öttı.
«Soŋǧy aida 25 myŋ sarbaz qaza tapty. AQŞ äzırlegen 28 tarmaqtan tūratyn bastapqy jospar ekı taraptyŋ ūsynystarymen qaita öŋdeldı, qazır tek bırneşe dauly tarmaq qaldy»,-dedı ol.
Būǧan deiın Tramp jurnalisterge jospardyŋ 28 tarmaqtan 22 tarmaqqa qysqartylǧanyn habarlaǧan. Sondai-aq bastapqy ūsynylǧan qūjattyŋ «jai ǧana karta» bolǧanyn jäne «Resei üşın tym tiımdı» dep eseptelgenın aitqan.
Bastapqy nūsqaǧa säikes, Ukraina keibır jerlerden bas tartyp, äsker sanyn qysqartuy tiıs edı. Sondai-aq NATO-ǧa müşe bolu ideiasynan bırjola bas tartuy qajet bolatyn. Al Reseige sanksiialardyŋ jūmsaruy jäne G8 formatyna qaita oralu mümkındıgı qarastyrylǧan.
