Almaty qalasynyŋ ekonomikalyq jüiesınde şaǧyn jäne orta biznes (ŞOB) sektory şeşuşı röl atqaryp, qalanyŋ tūraqty damuyn, serpındılıgın jäne bäsekege qabılettılıgın qamtamasyz etıp otyr. Osy salany qoldau maqsatynda 2026 jyly jergılıktı biudjetten 66 mlrd teŋge qarastyrylǧan. Būl ötken jylmen salystyrǧanda şamamen 30 paiyzǧa köp. Būl turaly Almaty qalasynyŋ äkımı Darhan Satybaldy Ortalyq kommunikasiialar qyzmetınde ötken baspasöz konferensiiasynda mälımdedı, dep habarlaidy «Adyrna» ūlttyq portaly.
Qala äkımınıŋ aituynşa, käsıpkerlıktı qoldaudyŋ qosymşa şarasy retınde onyŋ bastamasymen Almaty qalalyq mäslihaty arnaiy salyq rejimı boiynşa mölşerlemenı 4 paiyzdan 3 paiyzǧa deiın tömendetudı qoldaǧan. Būl şeşım qaladaǧy ıskerlık belsendılıktı arttyruǧa jäne käsıpkerlerge tüsetın salyq jüktemesın azaituǧa baǧyttalǧan.
«Şaǧyn jäne orta biznestıŋ öndırıstık äleuetın arttyru maqsatynda 2027 jyldyŋ soŋyna deiın 39 şaǧyn önerkäsıptık park ıske qosylady. Olardyŋ jalpy aumaǧy 226 myŋ şarşy metrden asady jäne 4,8 myŋǧa juyq jaŋa jūmys orny qūrylady. Bızdıŋ maqsatymyz — 2030 jylǧa qarai ŞOB-tyŋ qala ekonomikasyna qosatyn ülesın qazırgı 60 paiyzdan 65 paiyzǧa deiın jetkızu», — dedı Almaty äkımı.
Sondai-aq Darhan Satybaldy turizm salasynyŋ damuyna da toqtaldy. Onyŋ aituynşa, būl baǧyttaǧy basty mäselelerdıŋ bırı — turistık infraqūrylymnyŋ şekteulılıgı.
«Qazırgı taŋda Almaty tau klasterıne keluşılerdıŋ ortaşa täulıktık sany onyŋ ötkızu qabıletınen äldeqaida asyp tüsedı. Būl avtojoldar men aspaly joldardyŋ şamadan tys jükteluıne, qyzmet körsetu sapasynyŋ tömendeuıne jäne demaluşylardyŋ qauıpsızdıgıne tönetın täuekelderdıŋ artuyna äkelıp otyr. Osy mäselelerdı şeşu ärı halyqaralyq deŋgeidegı zamanaui, jyl boiy jūmys ısteitın turistık ortalyq qalyptastyru maqsatynda Almaty tau klasterın damytu jobasy jüzege asyryluda. Joba aiasynda «Şymbūlaq» pen «Oi-Qaraǧai» kurorttaryn aspaly joldar jelısı arqyly bırıktıru közdelgen», — dedı qala basşysy.
Äkımnıŋ mälımetınşe, atalǧan jobalar ıske asqan jaǧdaida şeteldık turister aǧyny jylyna 1 million adamǧa deiın artady dep kütılude. Al turizmnıŋ qala ekonomikasyna qosatyn jyl saiynǧy ülesı şamamen 300 mlrd teŋgege baǧalanyp otyr.
Sonymen qatar, halyqaralyq investisiialardy tartu arqyly Almaty halyqaralyq äuejaiyn qaita jaŋǧyrtu jūmystary bastaldy. Jobaǧa 362 mln AQŞ dollary kölemınde investisiia salynuda. Nätijesınde äuejaidyŋ ötkızu qabıletı 19 mln jolauşyǧa deiın ūlǧaiady. Qala äkımınıŋ aituynşa, būl joba Almatynyŋ turistık äleuetın odan ärı damytuǧa serpın beredı. Turister sanynyŋ artuyna bailanysty qalada qonaq üiler salu jäne turistık nysandardy paidalanuǧa beru boiynşa 25 joba jüzege asyryluyn jalǧastyrady.
