الماتى قالاسىنىڭ ەكونوميكالىق جۇيەسىندە شاعىن جانە ورتا بيزنەس (شوب) سەكتورى شەشۋشى ءرول اتقارىپ، قالانىڭ تۇراقتى دامۋىن، سەرپىندىلىگىن جانە باسەكەگە قابىلەتتىلىگىن قامتاماسىز ەتىپ وتىر. وسى سالانى قولداۋ ماقساتىندا 2026 جىلى جەرگىلىكتى بيۋدجەتتەن 66 ملرد تەڭگە قاراستىرىلعان. بۇل وتكەن جىلمەن سالىستىرعاندا شامامەن 30 پايىزعا كوپ. بۇل تۋرالى الماتى قالاسىنىڭ اكىمى دارحان ساتىبالدى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا مالىمدەدى، دەپ حابارلايدى «ادىرنا» ۇلتتىق پورتالى.
قالا اكىمىنىڭ ايتۋىنشا، كاسىپكەرلىكتى قولداۋدىڭ قوسىمشا شاراسى رەتىندە ونىڭ باستاماسىمەن الماتى قالالىق ءماسليحاتى ارنايى سالىق رەجيمى بويىنشا مولشەرلەمەنى 4 پايىزدان 3 پايىزعا دەيىن تومەندەتۋدى قولداعان. بۇل شەشىم قالاداعى ىسكەرلىك بەلسەندىلىكتى ارتتىرۋعا جانە كاسىپكەرلەرگە تۇسەتىن سالىق جۇكتەمەسىن ازايتۋعا باعىتتالعان.
«شاعىن جانە ورتا بيزنەستىڭ وندىرىستىك الەۋەتىن ارتتىرۋ ماقساتىندا 2027 جىلدىڭ سوڭىنا دەيىن 39 شاعىن ونەركاسىپتىك پارك ىسكە قوسىلادى. ولاردىڭ جالپى اۋماعى 226 مىڭ شارشى مەتردەن اسادى جانە 4,8 مىڭعا جۋىق جاڭا جۇمىس ورنى قۇرىلادى. ءبىزدىڭ ماقساتىمىز — 2030 جىلعا قاراي شوب-تىڭ قالا ەكونوميكاسىنا قوساتىن ۇلەسىن قازىرگى 60 پايىزدان 65 پايىزعا دەيىن جەتكىزۋ»، — دەدى الماتى اكىمى.
سونداي-اق دارحان ساتىبالدى تۋريزم سالاسىنىڭ دامۋىنا دا توقتالدى. ونىڭ ايتۋىنشا، بۇل باعىتتاعى باستى ماسەلەلەردىڭ ءبىرى — تۋريستىك ينفراقۇرىلىمنىڭ شەكتەۋلىلىگى.
«قازىرگى تاڭدا الماتى تاۋ كلاستەرىنە كەلۋشىلەردىڭ ورتاشا تاۋلىكتىك سانى ونىڭ وتكىزۋ قابىلەتىنەن الدەقايدا اسىپ تۇسەدى. بۇل اۆتوجولدار مەن اسپالى جولداردىڭ شامادان تىس جۇكتەلۋىنە، قىزمەت كورسەتۋ ساپاسىنىڭ تومەندەۋىنە جانە دەمالۋشىلاردىڭ قاۋىپسىزدىگىنە تونەتىن تاۋەكەلدەردىڭ ارتۋىنا اكەلىپ وتىر. وسى ماسەلەلەردى شەشۋ ءارى حالىقارالىق دەڭگەيدەگى زاماناۋي، جىل بويى جۇمىس ىستەيتىن تۋريستىك ورتالىق قالىپتاستىرۋ ماقساتىندا الماتى تاۋ كلاستەرىن دامىتۋ جوباسى جۇزەگە اسىرىلۋدا. جوبا اياسىندا «شىمبۇلاق» پەن «وي-قاراعاي» كۋرورتتارىن اسپالى جولدار جەلىسى ارقىلى بىرىكتىرۋ كوزدەلگەن»، — دەدى قالا باسشىسى.
اكىمنىڭ مالىمەتىنشە، اتالعان جوبالار ىسكە اسقان جاعدايدا شەتەلدىك تۋريستەر اعىنى جىلىنا 1 ميلليون ادامعا دەيىن ارتادى دەپ كۇتىلۋدە. ال ءتۋريزمنىڭ قالا ەكونوميكاسىنا قوساتىن جىل سايىنعى ۇلەسى شامامەن 300 ملرد تەڭگەگە باعالانىپ وتىر.
سونىمەن قاتار، حالىقارالىق ينۆەستيتسيالاردى تارتۋ ارقىلى الماتى حالىقارالىق اۋەجايىن قايتا جاڭعىرتۋ جۇمىستارى باستالدى. جوباعا 362 ملن اقش دوللارى كولەمىندە ينۆەستيتسيا سالىنۋدا. ناتيجەسىندە اۋەجايدىڭ وتكىزۋ قابىلەتى 19 ملن جولاۋشىعا دەيىن ۇلعايادى. قالا اكىمىنىڭ ايتۋىنشا، بۇل جوبا الماتىنىڭ تۋريستىك الەۋەتىن ودان ءارى دامىتۋعا سەرپىن بەرەدى. تۋريستەر سانىنىڭ ارتۋىنا بايلانىستى قالادا قوناق ۇيلەر سالۋ جانە تۋريستىك نىسانداردى پايدالانۋعا بەرۋ بويىنشا 25 جوبا جۇزەگە اسىرىلۋىن جالعاستىرادى.
