«Qazaqmys» korporasiiasy Qazaq Stroy kompaniiasynyŋ basqaruyna öttı. Būl turaly CMN.KZ jazdy, dep habarlaidy «Adyrna» tılşısı.
«Aqparatty Qazaq Stroy kompaniiasy resmi türde rastady»,-delıngen habarlamada.
«Qazaqmystyŋ» menşık iesın özgertu turaly qauesetter ötken küzde-aq tarai bastaǧan edı. Alaida ūzaq uaqyt boiy būl mälımettı taraptardyŋ eşqaisysy naqtylamady. Tek 10 jeltoqsanda aksionerlık qoǧam ökılderı resmi baspasöz habarlamasyn taratyp, «Qazaqmys» korporasiiasyna baqylaudy özgertu räsımı men ramalyq kelısımge qol qoiylǧanyn mälımdegen. Mämılenı Jaŋa jylǧa deiın jabu josparlanǧan.
Mys alybynyŋ jaŋa iesı — köpsalaly Qazaq Stroy kompaniialar toby. Toptyŋ benefisiary — käsıpker Nūrlan Artyqbaev. 2024 jylǧy derek boiynşa, ol Qazaqstandaǧy eŋ bai adamdar tızımınde 44-orynda tūrǧan, al bailyǧy 228 mln dollar dep baǧalanǧan.
Forbes derekterıne säikes, Kazakhmys korporasiiasynyŋ jyldyq tabysy 1,3 trln teŋgenı qūraidy, al qyzmetkerler sany 32 myŋnan asady. Holding qūramyna Qaraǧandy, Ūlytau, Jambyl jäne Abai oblystaryndaǧy kenışter, baiytu fabrikalary men mys balqytu zauyttary kıredı.
Qazaq Stroy kompaniialar toby Qazaqtelekom kompaniiasyndaǧy üleske jäne gaz ken ornyndaǧy 75 paiyzdyq üleske ielık etedı. Sonymen qatar, top Türkıstan oblysynda jylyna 800 myŋ tonna önım şyǧaratyn kükırt qyşqyly zauytyn salu jobasyn jüzege asyryp jatqan kompaniianyŋ teŋ iesı sanalady.
Būdan bölek, Qazaq Stroy tobyna kıretın Qazaq Kalium kompaniiasyna Batys Qazaqstan oblysynda ornalasqan älemdegı eŋ ırı kalii tūzdary ken oryndarynyŋ bırı tiesılı. Josparǧa säikes, 2027 jyldyŋ soŋyna qarai kalii tyŋaitqyştaryn öndıretın tau-ken baiytu keşenı ıske qosylady. Qūrylys jūmystaryn nemıstıŋ Thyssen Schachtbau GmbH kompaniiasy jürgızıp jatyr. Käsıporynnyŋ jobalyq quaty jylyna 6 mln tonna önımdı qūrap, 4 myŋ tūraqty jūmys ornyn aşu közdelgen. Būl jobaǧa Qazaq Stroy toby qarjy instituttarymen bırlesıp şamamen 2,4 mlrd dollar investisiia salmaq. Däl osy zauyt Qazaqstannyŋ kalii tyŋaitqyştaryn öndıru boiynşa älemdegı TOP-5 eldıŋ qataryna enuıne mümkındık beredı.
Aita keteiık, Qazaq Stroy kompaniialar toby äleumettık baǧyttaǧy jobalardy jüielı türde jüzege asyryp keledı. Soŋǧy 10 jylda käsıporyn jalpy aumaǧy 4,8 mln şarşy metrden asatyn tūrǧyn üi saldy. Sonyŋ ışınde 3,6 mln şarşy metrı — äleumettık tūrǧyn üi. Sonymen qatar kompaniia jyl saiyn köpbalaly jäne az qamtylǧan otbasylarǧa 100 päterden tegın berıp otyrady.
