IýNİSEF «Qazaqstan balalary» (2026–2030) ūlttyq baǧdarlamasynyŋ qabyldanuyn qūptaidy. Būl — el halqynyŋ şamamen 34 paiyzyn qūraityn 6,9 million balanyŋ äl-auqatyn jaqsartuǧa baǧyttalǧan keşendı ūlttyq strategiia.
Qazaqstan Respublikasynyŋ Prezidentı Qasym-Jomart Toqaevtyŋ bastamasymen äzırlengen baǧdarlama balalar müddesındegı memlekettık saiasattyŋ bıryŋǧai strategiialyq közqarasyn qalyptastyrady jäne 2026–2030 jyldar aralyǧynda balalardy äleumettık qorǧau, densaulyq saqtau, bılım beru jäne qauıpsızdık salalaryn nyǧaituǧa baǧyttalǧan 158 naqty ıs-şarany qamtidy. Baǧdarlamanyŋ jalpy biudjetı 2,6 mlrd AQŞ dollaryn qūraidy.
Baǧdarlama otbasylardy qoldauǧa jäne pozitivtı ata-ana tärbiesın damytuǧa, balalardyŋ sifrlyq qauıpsızdıgın qamtamasyz etuge, sondai-aq balaǧa baǧdarlanǧan infraqūrylymdy damytuǧa, onyŋ ışınde jaŋa medisinalyq jäne oŋaltu mekemelerın saluǧa, inkliuzivtı jäne balaǧa qolaily qyzmetterdı keŋeituge erekşe nazar audarady. Sonymen qatar, öŋırlık deŋgeide balalardy qorǧau jüiesın küşeitu, mamandardyŋ käsıbi standarttaryn arttyru jäne mektepterde psihologiialyq qoldaudy damytu maŋyzdy basymdyqtardyŋ bırı bolyp tabylady.
IýNİSEF Qazaqstan Ükımetımen bırlese otyryp baǧdarlamany äzırleu barysynda negızgı strategiialyq ärıptes retınde äreket ettı jäne Balalar qūqyqtary turaly konvensiianyŋ halyqaralyq normalary men standarttarynyŋ, BŪŪ-nyŋ jahandyq strategiialarynyŋ jäne ozyq halyqaralyq täjıribelerdıŋ ūlttyq saiasatqa engızıluın qamtamasyz ettı. IýNİSEF sarapşylary baǧdarlamanyŋ arhitekturasyn qalyptastyruǧa, onyŋ ışınde tūjyrymdamalyq negızderdı, nätijelık körsetkışterdı, salaaralyq üilestıru tetıkterın, sondai-aq ıske asyrudy monitoringteu jäne baǧalau täsılderın äzırleuge jüielı qoldau körsettı.
IýNİSEF sondai-aq baǧdarlamanyŋ negızgı komponentterın äzırleuge qoldau körsettı, onyŋ ışınde balalar men otbasylardy erte anyqtau jäne süiemeldeu jüielerın damytu, balalardy qorǧauǧa arnalǧan sifrlyq şeşımder, äleumettık jäne psihologiialyq qoldau qyzmetterın keŋeitu, sondai-aq balalar qūqyqtaryn qorǧau salasyndaǧy mamandardyŋ kadrlyq äleuetın nyǧaitu bar. Baǧdarlama balalardyŋ naqty qajettılıkterıne baǧdarlanuyn qamtamasyz etu üşın IýNİSEF jahandyq däleldı täjıribelerge, MICS1 derekterıne jäne analitikalyq zertteulerge süiendı.
Baǧdarlama Qazaqstan Respublikasynyŋ Memlekettık keŋesşısınıŋ, Bala qūqyqtary jönındegı uäkıldıŋ, Oqu-aǧartu ministrlıgınıŋ, Balalardyŋ qūqyqtaryn qorǧau komitetınıŋ, sondai-aq azamattyq sektor men ūlttyq konsultasiialar barysynda pıkırlerı eskerılgen balalardyŋ qatysuymen jüzege asqan tyǧyz vedomstvoaralyq yntymaqtastyqtyŋ nätijesı bolyp tabylady.
«Qazaqstan balalary» baǧdarlamasynyŋ qabyldanuy Tūraqty damu maqsattaryna, onyŋ ışınde TDM 3 «Densaulyq pen äl-auqat», TDM 4 «Sapaly bılım» jäne TDM 10 «Teŋsızdıktı qysqartu» maqsattaryna qol jetkızuge maŋyzdy üles qosyp, balalardyŋ qūqyqtaryn qorǧaudyŋ ūlttyq jüiesın nyǧaitady.
IýNİSEF baǧdarlamany ıske asyru barysynda Qazaqstan Ükımetımen strategiialyq ärıptes retınde yntymaqtastyqty jalǧastyra otyryp, halyqaralyq saraptamany jūmyldyrudy, ūlttyq jäne öŋırlık deŋgeilerde reformalardy engızuge qoldau körsetudı, tūraqty qarjylandyru jäne eseptılık jüielerın damytudy, sondai-aq balalar men jastardyŋ saiasatty qalyptastyruǧa qatysuyn küşeitudı qamtamasyz etedı.
