Almatyda būrynǧy dın qyzmetkerı İakov Voronsov ūstaldy. Būl turaly qalalyq polisiia departamentınıŋ baspasöz qyzmetı mälımdedı, dep habarlaidy “Adyrna”.
Polisiia mälımetınşe, qalanyŋ tergeu basqarmasy esırtkı zattaryn tūtynu üşın priton ūiymdastyru faktısı boiynşa qylmystyq ıstı tergep jatyr.
«Küdık boiynşa 1986 jyly tuǧan er adam ūstaldy. Tıntu şaralary barysynda ūntaq tärızdı zattar tärkılendı. Medisinalyq kuälandyru onyŋ esırtkı zattaryn qoldanǧanyn rastady», – dep habarlady Almaty PD baspasöz qyzmetı.
Vedomstvonyŋ mälımetınşe, qazırgı uaqytta ıs boiynşa keşendı tergeu äreketterı jürgızılıp, qūqyqqa qarsy äreketke qatysy bar barlyq tūlǧalar men män-jailar anyqtaluda.
Voronsovtyŋ advokaty Ǧalym Nūrpeiısov öz kezegınde qorǧauyndaǧy adamǧa qylmystyq tergeu aiasynda eşqandai aiyp taǧylmaǧanyn mälımdedı.
«İakov Voronsovqa qatysty tıntu jürgızıldı. Tüngı uaqytta proseduralyq talaptar būzylyp, onyŋ qanynan esırtkı zattary men alkogoldıŋ bar-joǧyn anyqtau üşın medisinalyq saraptama jasaldy. Nätijesınde taldaulardan kannabis ızderı tabylǧan. Sonyŋ negızınde oǧan esırtkı zattaryn medisinalyq maqsatsyz qoldanu boiynşa äkımşılık hattama toltyryldy. Alaida qorǧauymdaǧy azamat saraptama qorytyndysyn joqqa şyǧarady», – dedı Nūrpeiısov.
Onyŋ aituynşa, bügın, 13 aqpanda, sot otyrysy ötıp, onyŋ qorytyndysy boiynşa Voronsovqa 10 täulıkke äkımşılık qamau jazasy taǧaiyndalǧan.
Aita ketsek, dın qyzmetkerı 2022 jyldyŋ aqpan aiynda soǧysqa qarsy ūstanymyn aşyq bıldırıp, Ukrainadaǧy beibıtşılıkke şaqyrǧan aşyq hatqa qol qoiǧan şamamen 292 pravoslavie dın qyzmetkerınıŋ qataryna qosylǧannan keiın tanymal boldy.
2023 jyly ol qyzmetınen şettetıldı, al 2024 jyly dın qyzmetkerı märtebesınen aiyrylǧan edı.
Sondai-aq 2024 jyly Voronsovqa qatysty Qylmystyq kodekstıŋ 141-baby («Ūltaralyq arazdyqty qozdyru») boiynşa qylmystyq ıs qozǧalǧan, alaida keiınnen qylmys qūramy bolmaǧandyqtan tergeu toqtatyldy.
Būǧan deiın Almaty qalasynyŋ mamandandyrylǧan audanaralyq äkımşılık soty būrynǧy dıni qyzmetker İakov Voronsovtyŋ qalalyq ädılet departamentı men Qazaqstannyŋ Ädılet ministrlıgıne qarsy bergen talap-aryzyn öndırıske qabyldaǧanyn habarladyq.
Talapker memlekettık tırkeuden bas tartudy zaŋsyz dep tanudy, sondai-aq jauapkerlerdı dıni bırlestıktı tırkeuge mındetteudı sūrap otyr. Qūjattyŋ özge egjei-tegjeiı jariialanǧan joq.
Bırneşe jyl būryn Voronsov Qazaqstanda Orys pravoslav şırkeuınıŋ Mäskeu patriarhatyna baǧynbaityn derbes pravoslav şırkeuın qūruǧa ärekettengen. Ol Ädılet ministrlıgıne ekı ret qūjat tapsyrǧanymen, ekı märte de tırkeuden bas tartylǧan.
