Polşada Qazaqstan azamaty Ekaterina Şilova joǧalyp kettı, dep habarlaidy "Adyrna" ūlttyq portaly Zakon.kz-ke sıltep.
Būl turaly onyŋ äpkesı äleumettık jelıde habarlap, ızdeu jariialaǧan.
"Sıŋlım joǧalyp kettı. Şilova Ekaterina Anatolevna, 1982 jyly tuǧan. 18 aqpan künı Varşavadan Astanaǧa ūşuy kerek edı. Alaida ūşaqqa otyrmaǧan. Jūmys ıstep jürgen, janynda aqşasy bolǧan", – delıngen habarlamada.
Tuystarynyŋ aituynşa, Ekaterinadan kümändı habarlama kelgen. Onda ol Germaniiaǧa jūmysqa şaqyrylǧanyn jäne bilet aqşasy qaitarylǧanyn jazǧan.
"Būl habarlamany özı jazbaǧanyna senımdımız. Körgen-bılgender bolsa, habarlasularyŋyzdy sūraimyz", – dedı äpkesı Aleksandra.
Qazaqstannyŋ syrtqy ıster ministrlıgı jaǧdaidan habardar ekenın mälımdedı. Vedomstvonyŋ mälımetınşe, Varşavadaǧy konsuldyq bölım Polşa qūzyrly organdaryna resmi nota joldaǧan.
Varşava qalasynyŋ polisiiasy aqparatty qabyldap, ıs ızdestıru departamentıne berılgen. Qazırgı uaqytta qajettı konsuldyq kömek körsetılıp, mäsele ministrlıktıŋ baqylauynda.
