Mamyr aiynan bastap qazaqstandyqtar ūşaq bortyna muzykalyq aspaptaryn, onyŋ ışınde dombyrany alyp kıre alady. Qazır muzykalyq aspaptardy äue arqyly tasymaldau mäselesın zaŋnamalyq tūrǧyda rettelıp jatyr. Būl turaly Kölık vise-ministrı Talǧat Lastaev aitty, dep habarlaid "Adyrna".
«Jaqyn arada bız jolauşylar men jüktıŋ tasymaldanuy turaly erejelerge tiıstı özgerıster engızemız. Onda qandai tärtıppen muzykalyq aspapty tasymaldauǧa bolatyny aiqyn körsetıletın bolady. Menıŋ oiymşa, naqtyraq bolu üşın būl şeşım bır ai ışınde qabyldanady», – dep tüsındırdı Talǧat Lastaev senat kuluaryndaǧy brifing barysynda.
Vise-ministr atap ötkendei, jaŋa erejeler barlyq äue kompaniialaryna ortaq bolady.
«İä, būl jalpy erejeler. Şyndyǧynda, qoǧam tarapynan sūranys bar, muzykalyq aspaptardy tasymaldauǧa qatysty naqty keister bolǧan. Sondyqtan jalpy erejeler boluy üşın jäne äue kompaniialary osyǧan süiene aluy üşın, azamattyq aviasiia komitetı osy baǧytta belsendı jūmys ıstep jatyr», – dedı vise-ministr.
BAQ ökılı «barlyq muzykalyq aspaptardy ūşaq salonynda alyp jüruge bola ma, älde būl tek dombyraǧa qatysty ma?» dep sūrady.
Lastaev qazır däl osy mäsele jan-jaqty talqylanyp jatqanyn aitady.
«Būl aspaptyŋ naqty kölemıne bailanysty, iaǧni bız aldyn ala qandai habarlama beru kerektıgın, naqty tärtıp qandai bolatynyn eskere otyryp şeşım qabyldaimyz. Sol arqyly adam özınıŋ muzykalyq aspabyn dūrys jäne eş qiyndyqsyz tasymalai alatynyn tüsınedı», – dedı Lastaev.
Vise-ministrdıŋ aituynşa, eger şeşım qabyldansa, qazaqstandyqtar 2026 jylǧy mamyrdan bastap ūşaqqa muzykalyq aspaptaryn alyp kıre alady.
