Senat Töraǧasy Mäulen Äşımbaevtyŋ «Reformalar mänı-6: Qūbylmaly älemdegı strategiialyq mümkındıkter» atty jaŋa maqalasynda Qazaqstannyŋ jelılık egemendık qaǧidatyna negızdelgen syrtqy saiasi jäne geoekonomikalyq strategiiasynyŋ jaŋa modelın qalyptastyru mäselesıne erekşe män berılgen.
Avtor atap ötkendei, Memleket basşysynyŋ şeşımderı būl proseste şeşuşı röl atqaryp, damudyŋ jaŋa ülgısıne köşudı qamtamasyz ettı.
«Prezidentımız Qasym-Jomart Kemelūly Toqaevtyŋ tiımdı ärı jaŋaşyl saiasaty ūltymyz üşın jaŋa mümkındıkter terezesın aiqara aşyp otyr. Sol tereze arqyly yqpaldy, demokratiialyq memleketke ainalǧan, quatty instituttary qalyptasqan, öŋırlık köşbasşy jäne XXI ǧasyrdaǧy jaŋa jahandyq tärtıpten laiyqty ornyn alǧan bolaşaq Qazaqstannyŋ jarqyn beinesın aiqyn köremız», – deidı Mäulen Äşımbaev.
Maqalada älemdık jüienıŋ transformasiialanuy jaǧdaiynda Qazaqstan alpauyt memleketterdıŋ müddelerıne beiımdeludı qoiyp, özınıŋ kürdelı bailanys jelısın qūruǧa köşıp jatqany aitylǧan. Mūnda elımız şetkerı element emes, jahandyq prosesterdıŋ maŋyzdy ärı taptyrmas qatysuşysy retınde körınedı.
Mäulen Äşımbaevtyŋ pıkırınşe, jaŋa şynaiylyqta «quatty memleket – jahandyq aǧyndar ötetın hab nemese torap ıspettes», al älemdık saiasattyŋ logikasy: «kımde-kım osyndai toraptar men bailanystarǧa baqylau jasasa, sol älemdı baqylauyna alady» degen formulamen anyqtalady.
Osy tūrǧyda jelılık egemendıktıŋ negızgı ūǧymy engızıledı, būl beiımdelu saiasatynan jahandyq jüiede öz qūndylyǧyn jasau strategiiasyna köşudı bıldıredı.
«Eger klassikalyq köpvektorlyq – janjaldaspau önerı bolsa, jelılık egemendık – basqaǧa qajettı bolu önerı», – dep atap öttı Senat Töraǧasy.
Būl modeldıŋ ıs jüzınde jüzege asyryluyna erekşe köŋıl bölıngen. Maqalada kölık jäne logistikalyq dälızderdıŋ damuy arqasynda Qazaqstan negızgı naryqtar men ekonomikalyq keŋıstıkterdı bailanystyra otyryp, «geografiialyq tyǧyryqtan Euraziiadaǧy maŋyzdy toǧyz joldyŋ torabyna» ainalyp otyrǧany atap ötılgen.
Jaŋa strategiia elımızdı jahandyq arhitekturadaǧy rölın küşeite otyryp, «teŋızge şyǧatyn joly joq landlocked elden qūrlyqty bailanystyratyn land-linked elge» ainaluyna mümkındık beretını basa aitylady.
Palata Spikerı Prezident Qasym-Jomart Toqaevtyŋ qūbylmaly älem tetıkterın köregendıkpen tüisınuı jäne innovasiialyq saiasatynyŋ arqasynda Qazaqstan bailanysqa, ikemdılıkke jäne jahandyq jüienıŋ taptyrmas elementı bolu qabıletıne negızdelgen memlekettılıktıŋ jaŋa ülgısın qalyptastyryp otyr degen qorytyndy jasaidy.
