Prezident Qasym-Jomart Toqaev BAÄ-nıŋ Qazaqstandaǧy elşısı Mūhammed Said Mūhammed äl-Arikidı qabyldady, dep habarlaidy "Adyrna".
Aqordanyŋ habarlauynşa, kezdesu barysynda Memleket basşysy Qazaqstannyŋ Bırıkken Arab Ämırlıkterımen dostyq jäne bauyrlastyq bailanystardy damytuǧa, özara müddege sai köptegen baǧyt boiynşa yntymaqtastyqty odan ärı nyǧaituǧa beiıl ekenın atap öttı.
Prezident halyqaralyq kün tärtıbındegı basty mäseleler jönınde ekı el ūstanymdarynyŋ ūqsastyǧyna nazar audardy.
Qasym-Jomart Toqaev Taiau Şyǧystaǧy ahualǧa, sonyŋ ışınde İran tarapynyŋ Bırıkken Arab Ämırlıkterı aumaǧyn bombalap jatqanyna alaŋdauşylyq tanytty.
Memleket basşysy atalǧan eldıŋ azamattyq infraqūrylymyna jasalǧan äskeri şabuyldy Qazaqstan alǧaşqylardyŋ bırı bolyp aiyptaǧanyn, būl turaly BAÄ Prezidentı şeih Mūhammed ben Zaid Äl Nahaianmen telefon arqyly söilesken kezde mälımdegenın eske saldy.
Qazaqstan Taiau Şyǧystaǧy äskeri ıs-qimyldardyŋ beitarap memleketterdı şarpyp jatqanyna qarsy. Osy oraida jaǧdaidy uşyqtyrmai, atalǧan äskeri qaqtyǧysqa qatysy joq BAÄ men Şyǧanaq elderınıŋ egemendıgın, aumaqtyq tūtastyǧyn būzbauǧa, sondai-aq şielenıstı saiasi-diplomatiialyq jolmen retteuge şaqyrady.
Prezident elımızdıŋ qajet bolǧan jaǧdaida beibıt kelıssözder ötkızu üşın alaŋ ūsynuǧa daiyn ekenın rastady.
Elşı Mūhammed Said Mūhammed äl-Ariki Qazaqstannyŋ BŪŪ Jarǧysynyŋ qaǧidattaryn berık ūstanyp, Ämırlıkter men Şyǧanaqtaǧy arab memleketterınıŋ yntymaqtastyq keŋesıne qatysuşy barlyq eldıŋ egemendıgıne, aumaqtyq tūtastyǧy men qauıpsızdıgıne qūrmetpen qaraǧany üşın Qasym-Jomart Toqaevqa rizaşylyǧyn bıldırdı.
