Qazaqstandyq oquşy Älihan Serıkov Stanford University universitetıne Restrictive Early Action erte ırıkteu baǧdarlamasy boiynşa tolyq qarjylyq grantpen oquǧa qabyldandy. Būl turaly bügın, 26 nauryzda Oqu-aǧartu ministrlıgı jazdy, dep habarlaidy «Adyrna» tılşısı.
Stanford älemdegı eŋ taŋdauly joǧary oqu oryndarynyŋ qataryna kıredı. Universitetke qabyldau deŋgeiı şamamen 3,6% qūraidy, al şeteldık talapkerler üşın būl körsetkış odan da tömen.
Älihan – robototehnika boiynşa älem chempionatynyŋ jüldegerı. Ol FIRST jarystaryna qatysyp, bastapqy deŋgeidegı FIRST LEGO League kezeŋınen bastap joǧary deŋgeidegı FIRST Tech Challenge sanatyna deiın jetken. Komanda qūramynda Ortalyq Aziia aimaqtyq chempionatynda jeŋıske jetıp, Hiuston qalasynda ötken älemdık kezeŋge joldama alǧan. Älem chempionatynyŋ qorytyndysy boiynşa komanda injeneriia, dizain, prezentasiia jäne qoǧammen jūmys baǧyttary boiynşa berıletın Inspire Award syilyǧynyŋ 3-ornyn ielengen.
Stanford universitetınde ol Management Science & Engineering baǧyty boiynşa bılım aludy josparlap otyr. Būl baǧdarlama– tehnologiialar, derekterdı taldau jäne basqaru salalaryn bırıktıretın pänaralyq baǧyt.
