Qaraǧandy äuejaiy auqymdy jaŋǧyrtu kezeŋıne qadam basty: aldaǧy 25 jylǧa arnalǧan damu master-jospary äzırlendı. Qūjatty halyqaralyq sarapşylar daiyndaǧan. Negızgı basymdyq — multimodaldy äue habyn qalyptastyryp, onyŋ ainalasynda ırı jük ekojüiesı — QarGoCity jobasyn ıske qosu. Bastamaǧa memleket pen jergılıktı bilık qoldau bıldırıp otyr.
Jobanyŋ keleşegı oblys äkımdıgınde ötken keŋeste talqylandy.
— Memleket basşysy eldıŋ tranzittık äleuetın damytu, ekonomikany ärtaraptandyru jäne jaŋa ösım nüktelerın qalyptastyrudyŋ maŋyzyn bırneşe ret atap öttı. Bızdıŋ öŋır üşın mūndai draiver Sary-Arka äuejaiy boluy tiıs. Būl äuejai halyqaralyq jük äue tasymaldaryn damytuǧa tolyq mümkındık beredı: mūnda elımızdegı aumaǧy boiynşa ekınşı ırı kargo-terminal ornalasqan, sondai-aq Latyn Amerikasy, Europa jäne Oŋtüstık-Şyǧys Aziiamen jük baǧyttary jolǧa qoiylǧan. Kelesı kezeŋ — qoldanystaǧy infraqūrylymnan halyqaralyq deŋgeidegı multimodaldy äue habyna köşu, — dedı oblys äkımı Ermaǧanbet Bölekpaev.
Qazır «Saryarqa» arnaiy ekonomikalyq aimaǧy aiasynda logistika, qaita öŋdeu jäne jük aǧyndaryna qyzmet körsetu baǧyttaryn damytuǧa arnalǧan mamandandyrylǧan subaimaq qūru pysyqtaluda. İnvestorlar men jaŋa öndırısterdı tartuǧa negız bolatyn jetı basym baǧyt aiqyndalǧan. Sonymen qatar äuejaiǧa tıkelei temırjol tarmaǧyn salu mäselesı qarastyrylyp jatyr.
«Sary-Arka äuejaiy» AQ direktorlar keŋesınıŋ töraǧasy Erlan Ospanov mälım etkendei, joba jospar deŋgeiınen naqty ıske asyru kezeŋıne ötıp keledı. Qaraǧandyda şamamen 600 gektar aumaqty qamtityn jaŋa kargo-aimaq salynuda, aerodrom infraqūrylymy keŋeitılıp, ırı jük ūşaqtaryn qabyldauǧa arnalǧan alaŋdar daiyndaluda.
Sondai-aq otyn bazasy da damyp keledı — äuejai eldegı ekı türlı aviaotyn türı bar sanauly nysandardyŋ bırıne ainalmaq.
Jük tasymalynyŋ kölemı de artyp keledı. Būǧan deiın Qaraǧandy jylyna şamamen 15 myŋ tonna jük qabyldasa, biyl būl körsetkıştı 100 myŋ tonnaǧa jetkızu josparlanyp otyr.
Al aldaǧy josparlar būdan da auqymdy. Basqaruşy serıktes Frans Van Gessennıŋ baǧalauynşa, aldaǧy on jyl ışınde jük kölemı jylyna 1 million tonnaǧa deiın ösuı mümkın.
— Qaraǧandy ırı jük habyn damytu üşın bıregei mümkındıkterge ie: tiımdı geografiialyq ornalasu, qoljetımdı jer resurstary, äue keŋıstıgınıŋ bos boluy, sondai-aq jolauşylar aǧynymen bäsekelespei, arnaiy jük infraqūrylymyn damytuǧa jaǧdai bar. Bız äuejai men oǧan ırgeles aumaqty damytudyŋ keşendı master-josparyn äzırledık. Būl tek äuejaidy keŋeitu jobasy emes, sonymen qatar QarGoCity logistikalyq jäne industriialyq ekojüiesın qalyptastyrudyŋ negızı. Osylaişa, Qaraǧandy Euraziianyŋ logistikalyq ortalyǧyna ainala alady, — dep tüiındedı Frans Van Gessen.
