Qazaqstan 2026 jyly 98 mln tonna mūnai öndırudı josparlap otyr. Būl turaly 10 mausymda Energetika ministrı Erlan Aqkenjenov aitty, dep habarlaidy «Adyrna» tılşısı.
«Biyl Teŋızdegı toqtaular men KQK infraqūrylymyna jasalǧan şabuyldardy eskere otyryp, 98 mln tonna mūnai öndırudı josparlap otyrmyz. Būǧan deiın şamamen 5 mln tonna mūnaidy joǧaltqanymyzdy aitqan edım», – dedı ministr.
Onyŋ sözınşe, Qazaqstan Qaşaǧan ken ornyndaǧy jöndeu jūmystaryn 2027 jylǧa auystyrǧan.
«Sondyqtan boljamdy körsetkışke qosymşa 2–2,5 mln tonna engızdık. Nätijesınde 98 mln tonna mūnai öndıremız dep eseptep otyrmyz», – dep tolyqtyrdy Aqkenjenov.
Būǧan deiın ministr 2026 jyldyŋ qorytyndysy boiynşa mūnai öndıru kölemı 96–98 mln tonna deŋgeiınde bolady dep boljaǧan edı.
Mamyr aiynyŋ soŋynda «Teŋızşevroil» kompaniiasy öndırıstık aqau saldarynan mūnai öndıru kölemı uaqytşa tömendegenın habarlaǧan bolatyn. Al 1 mausymda kompaniia mūnai öndıru kölemı qalpyna kelıp jatqanyn jäne qalypty deŋgeige jaqyndaǧanyn mälımdedı.
Qazaqstan mūnaiynyŋ şamamen 80 paiyzy eksporttalatyn Kaspii qūbyr konsorsiumy infraqūrylymyna ukrainalyq ekipajsyz katerler şabuyl jasaǧan. Sonyŋ saldarynan teŋızdegı tieu qūrylǧylarynyŋ bırı qatty zaqymdansa, ekınşısı sol kezde jöndeude bolǧan.
Aita keteiık, Qazaqstanda 2025 jyly 99,55 mln tonna mūnai öndırılıp, onyŋ 78,7 mln tonnasy eksportqa jöneltılgen.
