Özbekstanda ereuılderdı ötkızu tärtıbı alǧaş ret zaŋnamalyq deŋgeide tolyq rettelıp, eŋbek qūqyqtaryn qorǧauǧa jäne qoǧamdyq tärtıptı saqtauǧa baǧyttalǧan jaŋa zaŋ qabyldandy.
Özbekstan prezidentı Şavkat Mirziioev 11 mausym künı qol qoiǧan qūjat ereuıldı jariialau, ötkızu jäne toqtatu tärtıbın naqtylap qana qoimai, zaŋ talaptaryn būzǧany üşın jauapkerşılıktı de küşeitedı. Zaŋ Eŋbek kodeksıne, Qylmystyq kodekske, Äkımşılık jauapkerşılık turaly kodekske, Azamattyq prosestık kodekske, sondai-aq «Qoǧamdyq bırlestıkter turaly» jäne «Käsıpodaqtar turaly» zaŋdarǧa özgerıster engızedı. Ol resmi jariialanǧan künnen keiın üş ai ötken soŋ küşıne enedı.
Qūjatta ereuıl ūǧymyna naqty anyqtama berılgen: ol – jūmysşylardyŋ eŋbek mındetterın uaqytşa, erıktı jäne ūjymdyq türde tolyq nemese ışınara oryndaudan bas tartuy. Mūndai äreket ūjymdyq eŋbek dauyn şeşu jäne qyzmetkerlerdıŋ eŋbek, äleumettık-ekonomikalyq jäne käsıbi müddelerın qorǧau qūraly retınde qarastyrylady.
Zaŋǧa säikes, ereuılge şyǧu qūqyǧy tek tatulastyru jäne deldaldyq räsımder nätijesız bolǧan jaǧdaida nemese jūmys beruşı būl prosesterden bas tartqan kezde paida bolady. Ereuılge qatysu erıktı bolyp qala beredı.
Ereuıl ötkızu turaly şeşım kemınde bır ai būryn qabyldanuy tiıs. Ol qyzmetkerlerdıŋ jalpy jinalysynda, käsıpodaq komitetınıŋ ūsynysymen qabyldanady. Jinalysqa jūmysşylardyŋ kemınde jartysy qatysuy qajet, al şeşım qatysqandardyŋ kemınde 50 paiyzy qoldaǧan jaǧdaida bekıtıledı. Qūjatta daudyŋ mänı, ereuıldıŋ uaqyty men orny, sondai-aq onyŋ jetekşısı men ökılettıkterı körsetıluı tiıs.
Käsıpodaq organy jūmys beruşını ereuıl turaly bır jūmys künı ışınde habardar etuge mındettı, al jūmys beruşı tiıstı memlekettık organdarǧa aqparat beredı.
Zaŋ ereuılge qatysuşylarǧa bırqatar kepıldıkter beredı: olar tärtıptık jauapkerşılıkke tartylmaidy, jūmys orny men lauazymy saqtalady, alaida jalaqy tölenbeuı mümkın.
Sonymen bırge bırqatar şekteuler engızılgen. Tötenşe jaǧdai, soǧys nemese mobilizasiia kezeŋınde ereuıl ötkızuge tyiym salynady. Sondai-aq medisina, äsker, sot, qūqyq qorǧau organdary jäne ömırlık maŋyzdy infraqūrylym salalarynda jūmys ısteitın qyzmetkerler üşın arnaiy şekteuler qarastyrylǧan.
Jaŋa zaŋda ereuıl tärtıbın būzǧany üşın äkımşılık jäne qylmystyq jauapkerşılık te belgılengen. Qylmystyq jauapkerşılık zaŋsyz ereuıldı ūiymdastyru nemese oǧan mäjbürleu jaǧdailarynda küşeitılgen jaza qarastyrady.
Qūjattyŋ negızgı maqsaty – eŋbek qatynastaryn halyqaralyq standarttarǧa jaqyndatu, äleumettık ärıptestıktı damytu jäne qyzmetkerlerdıŋ qūqyqtaryn qūqyqtyq tūrǧyda naqty qorǧau.
