Qazaqstan mūsylmandary dıni basqarmasy oquşy qyzdarǧa oramal taǧuǧa mümkındık beretın jekemenşık mektepterge qatysty qataŋ şaralar qoldanuǧa qarsy ekenın mälımdedı, dep habarlaidy «Adyrna» tılşısı.
QMDB soŋǧy künderı qoǧamda mektep oquşylarynyŋ oramal taǧu mäselesı qaitadan qyzu talqylanyp jatqanyn atap öttı. Būǧan Oqu-aǧartu ministrınıŋ mektep formasyna qoiylatyn talaptardy saqtau turaly mälımdemesıne qatysty BAQ-ta taraǧan aqparat sebep bolǧan. Atap aitqanda, mektep formasyna qoiylatyn talaptardy būzǧan, sonyŋ ışınde oquşy qyzdarǧa oramal taǧuǧa rūqsat bergen jekemenşık bılım beru ūiymdary lisenziiasynan aiyryluy mümkın ekenı aitylǧan.
«İslam şariǧaty boiynşa baliǧat jasyna jetken mūsylman qyzǧa oramal taǧu – paryz. Būl mäseledegı dıni ükım özgermeidı. QMDB būǧan deiın de osy ūstanymdy bırneşe ret aşyq bıldırıp, mektep jasyndaǧy qyzdardyŋ bılım aluyna kedergı keltırmei, dıni mındetın oryndauyna mümkındık beretın oŋtaily şeşım qabyldau jönınde tiıstı memlekettık organdarǧa ūsynystaryn jetkızgen. Atap aitqanda, mektep formasynyŋ jalpy ülgısı men tüsıne üilesetın oramalǧa rūqsat beru ūsynylǧan», – delıngen habarlamada.
Basqarma zaiyrly memleket ūǧymy dındı joqqa şyǧaru nemese azamattardyŋ dıni senımderın şekteu degendı bıldırmeitının de atap öttı.
QMDB pıkırınşe, qoǧamda köp jyldan berı talqylanyp kele jatqan būl mäselenı tek tyiym salu jäne äkımşılık şaralar arqyly şeşu mümkın emes. Kerısınşe, mūndai qadamdar qoǧamdyq tüsınıspeuşılıktı küşeituı yqtimal. Osyǧan bailanysty basqarma Oqu-aǧartu ministrlıgı men özge de uäkılettı memlekettık organdarǧa mektep formasynyŋ talaptaryn saqtai otyryp, kämeletke tolǧan mūsylman qyzdardyŋ oramal taǧuyna mümkındık beretın naqty qūqyqtyq tetık äzırleudı ūsyndy.
Alaida keiınnen QMDB-nyŋ būl mälımdemesı öşırıldı. Bıraq būl äleumettık jelıdegı hidjab dauyn odan saiyn qyzdyra tüstı. Daulasqandar hidjabtan asyp, basqa da dıni ükımderdı talqyǧa ūsynyp jatyr. Bırı qoldap, bırı qarsy bolyp, bır-bırıne balaǧat aityp, qarǧys arnap jatqandar da kezdesedı.
