Jetısu oblysynda Balqaş jaǧalauyndaǧy turizmdı damytu baǧytynda auyldyq infraqūrylymdy jetıldıru boiynşa keşendı şaralar qabyldanuda. Atap aitqanda, Lepsı auylynda jaŋa temırjol vokzalynyŋ qūrylysy jürıp jatyr, polisiia punktınıŋ ǧimaraty qaita jaŋǧyrtylyp, auruhana ǧimaratyna kürdelı jöndeu jūmystary jasaluda. Qūrylys jūmystarynyŋ barysymen jäne atqarylǧan jūmystardyŋ nätijelerımen oblys äkımı Beibıt İsabaev Sarqan audanyna jasaǧan jūmys sapary barysynda tanysty, – dep habarlaidy Jetısu oblysy äkımınıŋ baspasöz qyzmetı.
Eŋ aldymen Beibıt İsabaev jaŋa temırjol vokzaly salynyp jatqan qūrylys alaŋyna bardy. Nysandy paidalanuǧa beru osy jyldyŋ tamyz aiyna josparlanǧan. Atalǧan nysan ıske qosylǧannan keiın jolauşylarǧa qauıpsız ärı sapaly qyzmet körsetuge, öŋırdıŋ kölık infraqūrylymynyŋ damuyna oŋ äserın tigızedı.
Nysandy salyp jatqan merdıger ūiym direktorynyŋ bırınşı orynbasary Medet Omarhanovtyŋ aituynşa, qazırgı taŋda qūrylys jūmystarynyŋ 45%-y aiaqtalǧan. Irgetastyŋ monolittı-beton jūmystary tolyq aiaqtaldy. Qazır ǧimarattyŋ qabyrǧalary qalanuda, al juyq arada ärleu jūmystary bastalady.
- Qūrylys nysanynyŋ jalpy aumaǧy 617 şarşy metrdı qūraidy. Vokzal ǧimaraty barlyq zamanaui talaptarǧa sai bolady. Jobada tambur, vestibiul, kütu zaly, sauda alaŋy, balaly jolauşylarǧa arnalǧan bölme, demalys bölmesı, sanitarlyq torap, sondai-aq bırqatar äkımşılık jäne tehnikalyq bölmeler qarastyrylǧan, – dedı M. Omarhanov.
Oblys äkımı öz kezegınde nysandy belgılengen merzımde aiaqtau üşın qūrylys qarqynyn jedeldetu qajettıgın aitty.
Mūndaǧy polisiia punktınıŋ ǧimaraty aǧymdaǧy jöndeu jūmystarynan keiın tolyqtai talapqa sai keltırılgen. Ǧimarat jöndeuden ötkızılıp qana qoimai, qyzmetkerlerge qolaily bolu üşın mūnda ashana men demalys bölmesı aşyldy, al ekınşı qabatta kazarmalyq ülgıdegı jataqhana bölmelerı jabdyqtaldy. Polisiia punktınde tūraqty negızde 5 qyzmetker jūmys ısteidı. Al turistık mausym kezınde qauıpsızdık pen qoǧamdyq tärtıptı qamtamasyz etu üşın jeke qūram sany 25 adamǧa deiın ūlǧaitylady. Sonymen qatar Lepsı auylynda sudaǧy qauıpsızdıktı qamtamasyz etu maqsatynda täulık boiy patruldık qyzmet atqaratyn qūtqaru bölımşesınıŋ 12 qyzmetkerı jūmys ısteidı.
Sondai-aq 30 oryndyq Lepsı auyldyq auruhanasyna kürdelı jöndeu jūmystary jalǧasuda. Biylǧy jyldyŋ säuır aiynda bastalǧan jūmystardyŋ qazırgı taŋda 30%-y oryndalǧan. Jöndeu jūmystaryn jyl soŋyna deiın aiaqtau josparlanyp otyr.
– Bızdıŋ auyldyq auruhanaǧa soŋǧy ret jöndeu jūmystary 2010 jyly jürgızılgen. Sondyqtan ǧimaratty zamanaui talaptarǧa sai jaŋartu qajettılıgı tuyndaǧan bolatyn. Būl medisinalyq qyzmet sapasyn arttyru üşın öte kerek, öitkenı pasientter sany jyl saiyn artyp keledı. Äsırese turistık mausymda Lepsıge keletın qonaqtar men demaluşylar qatary köbeiedı. Mäselen, ötken jyldyŋ özınde ǧana bızge 800 adam medisinalyq kömekke jügındı. Osyǧan bailanysty turistık mausym kezınde audandyq auruhanadan arnaiy mamandardy qosymşa jıberıp otyramyz. Jaqyn uaqytta taǧy üş därıger keledı, – dedı audandyq ortalyq auruhananyŋ direktory Altai Şūlǧaubaev.
Belgılı bolǧandai, audandyq auruhana ǧimaratyna kürdelı jöndeu jürgızılıp jatqan kezde nauqastardy jergılıktı emhana qabyldauda.
Beibıt İsabaev kelesı jyly osy emhana ǧimaratyna aǧymdaǧy jöndeu jūmystaryn jürgızudı tapsyrdy. Osylaişa, auyldaǧy densaulyq saqtau salasynyŋ ekı ırı nysany da zaman talabyna säikestendırılıp, jergılıktı tūrǧyndar men turister üşın sapaly medisinalyq qyzmetterdıŋ qoljetımdılıgı arta tüspek.
