Foto: Jūmabai Mūsabekov, Dmitrii Erofeev
Jetısu oblysy qūrylǧannan berı bılım beru infraqūrylymyn damytuǧa erekşe köŋıl bölınıp keledı. Osy uaqyt aralyǧynda 26 jaŋa bılım beru nysany salynyp, 33 nysanǧa kürdelı jöndeu jürgızıldı, beiımdelgen mektepterdıŋ sany ekı esege qysqardy. Sonymen qatar pedagogterdı jüielı qoldau jäne mūǧalım mamandyǧynyŋ bedelın arttyru baǧytyndaǧy jūmystar jalǧasuda. Atap aitqanda, Mūǧalımder künıne orai öŋırdıŋ 350-den astam pedagogı marapattaldy, olardyŋ 9-y memlekettık nagradalarǧa ie boldy. Pedagogterdı käsıbi merekesımen oblys äkımı Beibıt İsabaev Taldyqorǧan qalasyndaǧy Biken Rimova atyndaǧy akademiialyq drama teatrynda ötken saltanatty şarada qūttyqtady, dep habarlaidy Jetısu oblysy äkımınıŋ baspasöz qyzmetı.
Qūttyqtau sözınde Beibıt İsabaev öskeleŋ ūrpaqty tärbieleu men qoǧamdy damytuda pedagogterdıŋ airyqşa röl atqaratynyn atap öttı.
– Memleket basşysy Qasym-Jomart Toqaev tamyz keŋesınde: «Adamdy, onyŋ dünietanymyn özgertu tek naǧyz tälımgerdıŋ qolynan keledı», - dep atap öttı. Qoǧamda zaŋ men tärtıpke, tazalyq pen mädeniettılıkke negızdelgen jaŋa etikany qalyptastyru ısı osy maŋyzdy missiiadan, iaǧni mektep qabyrǧasynan bastalady. Balalarymyzdyŋ bılım aluy ǧana emes, tärbiesı, ömır qiyndyqtaryna daiyn boluy jäne adamgerşılık qasietı da sızderdıŋ jūmystaryŋyzǧa tıkelei bailanysty. Sondyqtan pedagogterdı qoldau men olardyŋ eŋbegıne laiyqty jaǧdai jasau – memlekettıŋ basym mındetterınıŋ bırı, – degen oblys äkımı bılım beru infraqūrylymyn damytu jäne öŋır pedagogterın qoldau şaralaryna keŋınen toqtaldy.
Özın-özı jetıldırudegı jetıstıkterımen, şyǧarmaşylyq ızdenısterımen, oqytudyŋ jaŋa täsılderı men ädısterın tiımdı qoldanuymen erekşelengen bırqatar pedagogtı atap ötken öŋır basşysy mūǧalımderdıŋ käsıbilıgı men öz ısıne degen adaldyǧy olardyŋ şäkırtterınıŋ jetıstıkterı men tabystarynan körınetının aitty. Būl rette auyl mektepterı oquşylarynyŋ arasynda ötetın «Myŋ bala» olimpiadasynda 33 bala jeŋımpaz atansa, 14 oquşy elımızdıŋ üzdık liseilerınde tegın bılım aluǧa joldama alǧan. Sonymen qatar soŋǧy 4 jylda öŋır oquşylary halyqaralyq olimpiadalar men ziiatkerlık baiqaularda 73 jüldelı orynǧa ie boldy, onyŋ 13-ı altyn, 28-ı kümıs jäne 32-sı qola medal.
Pedagogterdıŋ bılıktılıgın arttyru jūmystaryna da erekşe köŋıl bölınude. Atap aitqanda, oblys pedagogterınıŋ 85,5%-y oqu prosesınde jasandy intellektını qoldanu baǧytyndaǧy oqudan öttı. 12 myŋnan astam mūǧalım bılıktılıgın arttyrsa, 14 myŋnan astam pedagog sanatyna säikes lauazymdyq jalaqysyna ai saiynǧy üstemeaqy alady. Sondai-aq jyl saiyn «Üzdık pedagog» baiqauy ūiymdastyrylyp, onyŋ qorytyndysy boiynşa jeŋımpazdarǧa memlekettık granttar tabystalady. Sondai-aq soŋǧy 4 jylda 1400 jas mamanǧa «Diplommen - auylǧa» baǧdarlamasymen köterme aqy, sondai-aq 554 mamanǧa tūrǧyn üi satyp aluǧa jeŋıldetılgen nesie berıldı.
- Oblys qūrylǧannan berı jan-jaqty qoldaudyŋ arqasynda öŋırımızdıŋ 29 pedagogı joǧary memlekettık nagradalarǧa ie boldy. Pedagog-şeberlerımız de erekşe qūrmetke bölendı. Olardyŋ barlyǧy Ybyrai Altynsarin atyndaǧy tösbelgımen marapattaldy, – dedı B. İsabaev marapattau räsımıne köşıp.
Osy jiynda 8 pedagogke joǧary memlekettık nagralar berılıp, olarǧa «Qūrmet» ordenı, 2 «Eren eŋbegı üşın» medalı jäne 5 «Şapaǧat» medalı berıldı. Taǧy 5 pedagog «Ybyrai Altynsarin» medalımen marapattaldy. Eske salsaq, bügın Astanada Mūǧalımder künıne orai Prezidenttıŋ qatysuymen ötken saltanatty jiynda Taldyqorǧandaǧy Mūhtar Aryn atyndaǧy № 24 mamandandyrylǧan liseiınıŋ mūǧalımı Aiman Jantıleuova «Qazaqstannyŋ eŋbek sıŋırgen ūstazy» qūrmettı ataǧyna ie bolǧan edı.
Sondai-aq öŋır basşysy oblystyq baiqau nominasiialarynyŋ jeŋımpazdaryn da marapattady. Atap aitqanda, «Üzdık synyp jetekşısı» atalymynda Alaköl audany A. Baitūrsynūly atyndaǧy orta mekteptıŋ 8-synyp jetekşısı Möldır Tüsıpbekova jeŋımpaz atandy. «Üzdık auyl mektebı» atalymynda Kerbūlaq audany Ş. Uälihanov atyndaǧy orta mektep üzdık dep tanylsa, «Üzdık balabaqşa» atalymynda Köksu audanynyŋ «Alpamys» böbekjai-baqşasy jeŋımpaz atandy. Sarqan audany Abai atyndaǧy mektep-gimnaziianyŋ qazaq tılı men ädebietı pänınıŋ mūǧalımı Aida Arǧynbaeva «Jetısu ūstazy» atalymynyŋ jeŋımpazy boldy. Jeŋımpazdarǧa aqşalai sertifikattar tabystaldy.
Saltanatty şaranyŋ resmi bölımı öŋırdegı mektep oquşylary men kolledj studentterınıŋ qatysuymen daiyndalǧan merekelık konsertke jalǧasty.
- Bügın men üşın öte quanyşty kün. Ūstazdar merekesınde memlekettık nagradaǧa ie bolyp otyrmyn. Būl jalǧyz menıŋ ǧana eŋbegım emes, barşa ūstazdardyŋ adal qyzmetınıŋ baǧalanǧany dep bılemın. Memleket basşysy bılım salasyn damytuǧa erekşe köŋıl bölıp keledı. Sondyqtan elımızdıŋ erteŋı bolatyn jas ūrpaqty bılımdı ärı tärbielı etıp ösıruge bar küş-jıgerımızdı jūmsaimyz, - dedı «Qūrmet» ordanenıŋ iesı, M. Aryn atyndaǧy №24 mamandandyrylǧan liseidıŋ direktory Güljanar Espanova.
– Eŋ aldymen, ūstaz eŋbegıne erekşe köŋıl bölınıp jatqany üşın alǧys aitqym keledı. Bılım salasynda jürgenıme 42 jyl boldy. Bügıngı marapat – tek menıŋ ǧana eŋbegımnıŋ nätijesı emes, būl – bükıl pedagogikalyq ūjymymnyŋ eŋbegı, ärıptesterımnıŋ qoldauy, ata-analardyŋ senımı jäne ärine şäkırtterımnıŋ jetıstıkterınıŋ jemısı. Barşa ūstazdardy bügıngı merekemen qūttyqtaimyn, – dedı «Eren eŋbegı üşın» medalımen marapattalǧan Qaratal audany M. Gorkii atyndaǧy orta mekteptıŋ mūǧalımı Oktiabrina Kim.
Onyŋ sözın taǧy bır ärıptesı jalǧady:
– Menıŋ jūmysym jan-jaqty, bılımdı ärı ozyq oily jas ūrpaqty tärbieleu ekenın maqtan tūtamyn. Mūǧalım mamandyǧynyŋ qyzyǧy da osynda. Barlyq bastamalarymyzǧa qoldau körsetıp kele jatqan memleketımızge alǧys aitamyn. Türlı baiqaularǧa qatysyp, özımızdı är qyrymyzdan körsetuge mümkındık köp. Bız ärtürlımız, bıraq barlyǧymyz ortaq ıske qyzmet etıp kelemız. Merekelerıŋızben, qūrmettı ärıptester! – dedı Tekelı qalasyndaǧy №4 orta mekteptıŋ «Şeber» sanatyndaǧy mūǧalımı Natalia Baneskaia.
Atap ötsek, qazırgı taŋda Jetısu oblysynda 19 myŋ pedagog eŋbek etedı. Biylǧy oqu jylynda Rudnichnyi jäne Sūptai auyldarynda jaŋa mektepter ıske qosyldy. Al Respublika künı qarsaŋynda Köksai auylynda jaŋa mektep pen Taldyqorǧan qalasynda «Bılım-innovasiia» liseiınıŋ jaŋa ǧimaraty esıgın aiqara aşady. Sonymen qatar Qaratal audanynyŋ Üştöbe qalasynda, sondai-aq qaitarylǧan aktivter esebınen Köksu audanynyŋ Balpyq bi auylynda ärqaisysy 600 orynǧa arnalǧan mektepter salynuda. Būdan bölek, jyl soŋyna deiın öŋır mektepterı fizika, himiia jäne biologiia pänderıne arnalǧan 240 zamanaui kabinetpen jabdyqtalady.
