Qazaqstanda mausymnyŋ üşınşı jeksenbısı – Äkeler künı. Osyǧan orai «Otbasy – baqyt mekenı» jobasy aiasynda futboldan şeberlık sabaq ūiymdastyryldy. Sporttyq şaraǧa äkeler men balalar qatysyp, käsıbi bapkerlerdıŋ jetekşılıgımen arnaiy jattyǧular jasady. Sondai-aq basqosu soŋynda otbasylyq komandalar joldastyq match ötkızdı.
Şaranyŋ qūrmettı qonaǧy retınde «Äkeler odaǧy» respublikalyq qoǧamdyq bırlestıgı töraǧasynyŋ orynbasary, Astana qalalyq filialynyŋ basşysy Bekdaiyr Küzembai, «Äkeler odaǧy» bırlestıgınıŋ Astana qalalyq filialy töraǧasynyŋ orynbasary Temırhan Tūrlybaev jäne tanymal futbolşy, futboldan ūlttyq qūrama bas bapkerınıŋ assistentı Eldos Ahmetov qatysty.
– Üş jyl būryn Ükımet qaulysy şyǧyp, otbasyǧa qatysty ekı mereke resmi atap ötıletın boldy. Bırınşısı Analar künı, ekınşısı Äkeler künı. Mūndai qadam otbasy institutyn nyǧaituǧa jäne ata-babadan jetken salt-dästürımızdı nasihattauǧa zor üles qosyp keledı. Mereke qarsaŋyndaǧy el aumaǧynda ata-ana jauapkerşılıgın arttyruǧa arnalǧan kelelı jiyndar tolastaǧan emes. Bügıngı sporttyq şarada da äke men balanyŋ yntymaǧynyŋ, otbasy bırlıgınıŋ kuäsı boldyq, – deidı Bekdaiyr Küzembai.
Al tanymal sportşy Eldos Ahmetov äkelerdıŋ balalarymen bırge jattyǧyp, bırge alaŋǧa şyǧuyn jaqsy bastamaǧa balady.
– Äkeler men balalardy sport arqyly bırıktıretın osyndai şaralardyŋ maŋyzy öte zor. Futbol – tek oiyn emes, ol tärtıpke, jauapkerşılıkke jäne bır-bırın qoldauǧa üiretedı. Bügın alaŋda äkeler men balalardyŋ bırge jattyǧyp, bırge oinaǧanyn köru erekşe äser qaldyrdy. Osyndai kezdesuler otbasylyq bailanysty nyǧaityp, balalarǧa jaqsy ülgı beredı, – dedı Eldos Ahmetov.
Aita keteiık, «Otbasy – baqyt mekenı» jobasy astanalyq jas otbasylardy qoldau baǧytynda jüielı jūmys jürgızıp keledı. Jastardyŋ äleumettık mäselelerın şeşuge, olardyŋ jan-jaqty damuyna jäne bos uaqytyn tiımdı ötkızuıne yqpal etude.
