Jaŋa oqu jylynan bastap mektepterde jaŋa mındettı pänder engızıledı, olardyŋ ışınde «Konstitusiia negızderı» jäne «Jeke qauıpsızdık» bar. Būl turaly bügın, 1 şıldede Ükımet otyrysynda Oqu-aǧartu ministrı Jūldyz Süleimenova aitty, dep habarlaidy «Adyrna» tılşısı.
Onyŋ aituynşa, qazır teoriiany jattauǧa ǧana emes, jauapkerşılıktı tärbieleuge jäne qazırgı älemde qauıpsız ömır süruge basa nazar audarylady. 5-7 synyp oquşylary üşın «Konstitusiia negızderı» pänı engızıledı, onda oquşylar Qazaqstan Respublikasynyŋ konstitusiialyq qūrylysy, azamattardyŋ qūqyqtary men mındetterı, memlekettık basqaru qaǧidattary jäne qūqyqtyq mädeniet negızderı turaly jüielı bılım alady.
8–11-synyptarda «Zaŋ men tärtıp» mındettı kursy oqytylady. Būl pännıŋ negızgı maqsaty – qūqyqtyq sanany nyǧaitu, qūqyq būzuşylyqtyŋ aldyn alu, zaŋ talaptaryn qūrmetteu mädenietın qalyptastyru jäne azamattyq jauapkerşılıktı arttyru. Sonymen bırge 5–11-synyptarda «Jeke qauıpsızdık» mındettı kursy engızıledı. Būl oquşylardyŋ ömırlık qauıpsızdık mädenietın qalyptastyrumen qatar, aqparattyq qauıpsızdık, kibergigiena, tötenşe jaǧdailarda äreket etu jäne qauıpterdıŋ aldyn alu boiynşa praktikalyq daǧdylaryn damytuǧa baǧyttalady.
«Jaŋartylǧan bılım mazmūny eŋ aldymen tūlǧanyŋ jan-jaqty damuyna, ırgelı bılımdı nyǧaituǧa, azamattyq jauapkerşılıktı qalyptastyruǧa jäne zamanaui qūzyretterdı damytuǧa baǧyttalady. Sonymen qatar tärbielık komponenttıŋ mazmūny edäuır küşeitıledı. Bılım beru jüiesıne «Adal azamat» bıryŋǧai tärbie baǧdarlamasynyŋ qūndylyqtary, «Zaŋ men tärtıp» qaǧidaty, «Taza Qazaqstan» jalpyūlttyq bastamasy jäne jaŋa Konstitusiianyŋ negızgı ideialary men qūndylyqtary tolyq engızıletın bolady. Osylaişa mektep tek bılım beretın ūiym ǧana emes, zaŋǧa qūrmetpen qaraityn, eŋbektı baǧalaityn, memleket pen qoǧam aldyndaǧy jauapkerşılıgın sezınetın azamattardy qalyptastyratyn ortaǧa ainalady»,— dep atap öttı ministr.
