جاڭا وقۋ جىلىنان باستاپ مەكتەپتەردە جاڭا مىندەتتى پاندەر ەنگىزىلەدى، ولاردىڭ ىشىندە «كونستيتۋتسيا نەگىزدەرى» جانە «جەكە قاۋىپسىزدىك» بار. بۇل تۋرالى بۇگىن، 1 شىلدەدە ۇكىمەت وتىرىسىندا وقۋ-اعارتۋ ءمينيسترى جۇلدىز سۇلەيمەنوۆا ايتتى، دەپ حابارلايدى «ادىرنا» ءتىلشىسى.
ونىڭ ايتۋىنشا، قازىر تەوريانى جاتتاۋعا عانا ەمەس، جاۋاپكەرشىلىكتى تاربيەلەۋگە جانە قازىرگى الەمدە قاۋىپسىز ءومىر سۇرۋگە باسا نازار اۋدارىلادى. 5-7 سىنىپ وقۋشىلارى ءۇشىن «كونستيتۋتسيا نەگىزدەرى» ءپانى ەنگىزىلەدى، وندا وقۋشىلار قازاقستان رەسپۋبليكاسىنىڭ كونستيتۋتسيالىق قۇرىلىسى، ازاماتتاردىڭ قۇقىقتارى مەن مىندەتتەرى، مەملەكەتتىك باسقارۋ قاعيداتتارى جانە قۇقىقتىق مادەنيەت نەگىزدەرى تۋرالى جۇيەلى ءبىلىم الادى.
8–11-سىنىپتاردا «زاڭ مەن ءتارتىپ» مىندەتتى كۋرسى وقىتىلادى. بۇل ءپاننىڭ نەگىزگى ماقساتى – قۇقىقتىق سانانى نىعايتۋ، قۇقىق بۇزۋشىلىقتىڭ الدىن الۋ، زاڭ تالاپتارىن قۇرمەتتەۋ مادەنيەتىن قالىپتاستىرۋ جانە ازاماتتىق جاۋاپكەرشىلىكتى ارتتىرۋ. سونىمەن بىرگە 5–11-سىنىپتاردا «جەكە قاۋىپسىزدىك» مىندەتتى كۋرسى ەنگىزىلەدى. بۇل وقۋشىلاردىڭ ومىرلىك قاۋىپسىزدىك مادەنيەتىن قالىپتاستىرۋمەن قاتار، اقپاراتتىق قاۋىپسىزدىك، كيبەرگيگيەنا، توتەنشە جاعدايلاردا ارەكەت ەتۋ جانە قاۋىپتەردىڭ الدىن الۋ بويىنشا پراكتيكالىق داعدىلارىن دامىتۋعا باعىتتالادى.
«جاڭارتىلعان ءبىلىم مازمۇنى ەڭ الدىمەن تۇلعانىڭ جان-جاقتى دامۋىنا، ىرگەلى ءبىلىمدى نىعايتۋعا، ازاماتتىق جاۋاپكەرشىلىكتى قالىپتاستىرۋعا جانە زاماناۋي قۇزىرەتتەردى دامىتۋعا باعىتتالادى. سونىمەن قاتار تاربيەلىك كومپونەنتتىڭ مازمۇنى ەداۋىر كۇشەيتىلەدى. ءبىلىم بەرۋ جۇيەسىنە «ادال ازامات» بىرىڭعاي تاربيە باعدارلاماسىنىڭ قۇندىلىقتارى، «زاڭ مەن ءتارتىپ» قاعيداتى، «تازا قازاقستان» جالپىۇلتتىق باستاماسى جانە جاڭا كونستيتۋتسيانىڭ نەگىزگى يدەيالارى مەن قۇندىلىقتارى تولىق ەنگىزىلەتىن بولادى. وسىلايشا مەكتەپ تەك ءبىلىم بەرەتىن ۇيىم عانا ەمەس، زاڭعا قۇرمەتپەن قارايتىن، ەڭبەكتى باعالايتىن، مەملەكەت پەن قوعام الدىنداعى جاۋاپكەرشىلىگىن سەزىنەتىن ازاماتتاردى قالىپتاستىراتىن ورتاعا اينالادى»،— دەپ اتاپ ءوتتى مينيستر.
