Qazaqstannyŋ belgılı äskeri tarihşysy, jazuşy, jurnalist, qoǧam qairatkerı jäne Qazaqstan Jazuşylar odaǧynyŋ müşesı Jūmabai Orynǧaliūly Dospanov dünieden ozdy. Qaiǧyly habardy Qazaqstan Jazuşylar odaǧynyŋ baspasöz qyzmetı jetkızdı, dep habarlaidy "Adyrna".
Qazaqstan Jazuşylar odaǧynyŋ Basqarmasy Jūmabai Dospanovtyŋ dünieden ötuıne bailanysty tuǧan-tuystary men jaqyndaryna, ärıptesterı men oqyrmandaryna köŋıl aitty.
Jūmabai Dospanov 1952 jyly Atyrau oblysynda düniege kelgen. Ol Atyrau oblysyndaǧy Taŋdai orta mektebınde bılım alǧan. Eŋbek jolynda oblystyq salalyq käsıpodaq komitetınıŋ töraǧasy qyzmetın atqaryp, 1990 jyldardyŋ soŋy men 2000 jyldardyŋ basynda eldegı demokratiialyq qozǧalystarǧa belsene qatysty. Osy kezeŋde «Atyrau demokratiiaǧa järdemdesu ortalyǧyn» basqaryp, täuelsız «Altyn ǧasyr» gazetınıŋ negızın qalap, bas redaktory boldy.
2011 jyldan bastap Jūmabai Dospanov äskeri tarihty zertteuge den qoiyp, Ekınşı düniejüzılık soǧysqa qatysqan qazaqstandyq maidangerlerdıŋ ömırı men erlıgın mūraǧattyq qūjattar negızınde zerdeledı. Ol Resei Federasiiasy Qorǧanys ministrlıgınıŋ Ortalyq mūraǧatynyŋ materialdary arqyly būryn belgısız bolyp kelgen myŋdaǧan qazaq ofiserı men 7 700-den astam qazaqstandyq qyz-kelınşektıŋ maidandaǧy qyzmetın naqtylap, ǧylymi ainalymǧa engızdı.
Zertteuşınıŋ eŋbegınıŋ nätijesınde bırneşe ırgelı ǧylymi kıtap jaryq kördı. Solardyŋ qatarynda «Ekınşı düniejüzılık soǧystaǧy qazaq ofiserlerı» atty 10 tomdyq eŋbek erekşe oryn alady. Onda 8 400-den astam qazaq ofiserınıŋ äskeri qyzmet joly qūjattyq derektermen jüielengen. Sondai-aq «Sovet Odaǧynyŋ Batyry ataǧy berılmegen qazaqstandyqtar» köptomdyǧynda marapatqa ūsynylǧanymen, türlı sebeptermen joǧary ataq ala almaǧan jauyngerlerdıŋ erlıgı arhivtık qūjattar arqyly däleldengen. Al «Qaru men qalam» kıtabynda maidanger qalamgerler men ofiserlerdıŋ jauyngerlık ärı şyǧarmaşylyq joly baiandalady.
Ǧalym būdan bölek, podpolkovnik jäne maior şenınde qyzmet atqarǧan ondaǧan qazaq ofiserınıŋ, sondai-aq mergen, ūşqyş, bailanysşy, medisina qyzmetkerı bolǧan myŋdaǧan qazaqstandyq äieldıŋ taǧdyryn jeke zerttegen. Onyŋ ūzaq jyldarǧa sozylǧan «Qazaqstannyŋ qaharman maidangerlerı» jobasy Ūlttyq qūryltaida joǧary baǧalanyp, Ūly Otan soǧysyndaǧy Jeŋıstıŋ 80 jyldyǧyna orai köptomdyq jinaq retınde äzırlendı.
