Öskemen qalasynda äskeri boryşyn ötep jürgen 2004 jylǧy sarbaz joǧalyp kettı, dep habarlaidy «Adyrna» tılşısı.
Öskemen garnizony äskeri polisiia bölımınıŋ mälımetınşe, oqiǧa 23 şılde künı saǧat 06:30 şamasynda bolǧan. Qatardaǧy jauynger Marhan Aiqyn Erlanūly täulıktık nariad qūramynda kezekşı qyzmetın atqaryp jürgen kezde qyzmet ornyn öz erkımen tastap ketken.
Aldyn ala mälımet boiynşa, äskeri bölım aumaǧynan şyqqan kezde sarbaz äskeri formada bolǧan. Alaida vedomstvo ökılderı keiınnen onyŋ azamattyq kiımge auysuy mümkın ekenın joqqa şyǧarmady.
Äskeri polisiianyŋ mälımetınşe, ızdestırılıp jatqan sarbazdyŋ boiy – 177 sm, salmaǧy – şamamen 80 kg, dene bıtımı – ortaşa, közı men şaşy – qara, şaşy qysqa, betınde meŋderı bar.
«Äskeri polisiia bölımı ışkı ıster organdarymen bırlesıp ızdestıru ıs-şaralaryn jürgızıp jatyr. Osyǧan bailanysty Qazaqstan Respublikasy azamattarynan äskeri qyzmetşınıŋ jürgen jerı turaly qandai da bır mälımet belgılı bolǧan jaǧdaida habarlaudy sūraidy. Berılgen aqparattyŋ qūpiialylyǧy saqtalady. Izdestıru ıs-şaralary Qazaqstan Respublikasy Qaruly Küşterı Äskeri polisiia bas basqarmasy baqylauynda»,- delıngen habarlamada.
