Premer-ministrdıŋ orynbasary Qanat Bozymbaev Qaraǧandy oblysyna barǧan ıssapary barysynda «Energetikalyq jäne kommunaldyq sektorlardy jaŋǧyrtu» ūlttyq jobasynyŋ jüzege asyryluyn jäne tırşılıktı qamtamasyz etu nysandarynyŋ aldaǧy jylytu mausymyna daiyndyǧyn tekserdı.
Nysandardy aralau barysynda vise-premer Temırtau men Qaraǧandy qalalarynda bolyp, jylu magistraldarynyŋ, su tazartu qūrylystarynyŋ, elektr jelılerı men qosalqy stansalardyŋ jöndeu jūmystarymen tanysty. Būl infraqūrylymnyŋ basym bölıgı 1960-1990 jyldary paidalanuǧa berılgen, al keibır nysandardyŋ tozu deŋgeiı 70-80%-ǧa jetken.
Temırtauda negızgı jūmys jylu jelılerın jaŋartuǧa baǧyttalǧan. JM-3 jylu magistralınıŋ 8,27 şaqyrym qūbyry qaita jaŋartylyp jatyr. Būl jelı 60 myŋǧa juyq tūrǧyndy nemese 312 köpqabatty üi men 22 äleumettık nysandy qamtamasyz etıp otyr. Magistral 1967 jyldan berı paidalanylyp keledı, tozu deŋgeiı 75%-ǧa jetken, al soŋǧy bes jylda mūnda 38 aqau tırkelgen.
Sondai-aq vise-premerge byltyr aiaqtalǧan joba – JM-2A jylu magistralınıŋ 3,64 şaqyrymyn jöndeu jūmystarynyŋ nätijesı körsetıldı. Bügıngı taŋda būl magistral 7,2 myŋnan astam abonenttı jylumen qamtamasyz etude. Būryn tozu deŋgeiı 75%-ǧa jetken jäne soŋǧy bes jylda 31-ge juyq aqau şyqqan būl jelıde «Energetikalyq jäne kommunaldyq sektorlardy jaŋǧyrtu» ūlttyq jobasynyŋ nätijesınde alǧaş ret jylytu mausymy eşqandai apatsyz ärı ajyratusyz öttı.
Būdan ärı Premer-ministrdıŋ orynbasarynyŋ jūmys sapary Qaraǧandy qalasynda jalǧasyp, onda sumen jabdyqtau jüiesıne erekşe nazar audaryldy. Mūnda 50 jyldan astam uaqyt boiy kürdelı jöndeu körmegen «Qaraǧandy Su» JŞS-nıŋ su tazartu keşenın qaita jaŋartu jūmystary jürgızılıp jatyr. Nysannyŋ tozu deŋgeiı 80%-ǧa jetken, tek soŋǧy üş jyldyŋ özınde mūnda 89 apat bolǧan.
Būl keşennıŋ üzdıksız jūmys ısteuı Qaraǧandy, Temırtau qalalary men Aqtas kentınıŋ 695 myŋǧa juyq tūrǧynyn, sondai-aq Qaraǧandy JEO-3 ortalyǧyn auyzsumen qamtamasyz etuge tıkelei äser etedı. Qazırgı uaqytta mūnda negızgı qūrylystar men tehnologiialyq jabdyqtar jaŋartylyp jatyr. Jobanyŋ qūny – 15,1 mlrd teŋge.
Sondai-aq Qanat Bozymbaevqa oblystyŋ elektr jelılerın jaŋǧyrtu jūmystary tanystyryldy. Öŋırde elektr beru jelılerı men qosalqy stansalardy qaita jaŋartu boiynşa alty joba äzırlengen. Onyŋ törteuı qazırdıŋ özınde jüzege asyrylyp jatyr: 110 kV ekı jelı men ekı qosalqy stansa jaŋartyluda. Būl jūmystar jelılerdıŋ tozuyn azaituǧa jäne aimaqty elektrmen qamtamasyz etu senımdılıgın arttyruǧa baǧyttalǧan.
Jūmys sapary Qaraǧandydaǧy M-3 jylu magistralın aralaumen aiaqtaldy. Onda vise-premer qalanyŋ ekı ırı jylu magistralın qaita jaŋartu barysymen tanysty. M-3 jelısınde 2,4 şaqyrym qūbyr jaŋartylyp jatyr. Mūndaǧy magistral 183 myŋǧa juyq tūrǧyndy, 817 köpqabatty üidı jäne 611 äleumettık-mädeni nysandy jylumen qamtamasyz etedı. Qaita jaŋartudan keiın qoldanystaǧy jüienıŋ tiımdılıgı artyp, jaŋa tūrǧyn üilerdı, äleumettık nysandar men biznes nysandaryn qosuǧa mümkındık bolady.
Sonymen qatar M-2 jylu magistralı men №2 sorǧy stansasyn qaita jaŋartu jūmystary jalǧasuda. Nätijesı qazırdıŋ özınde aiqyn: jylytu mausymyndaǧy aqaular sany 36-dan ekıge deiın azaidy. Joba tolyq aiaqtalǧannan keiın Qaraǧandynyŋ ortalyq bölıgındegı 64 myŋǧa juyq tūrǧyn tūraqty jylumen qamtamasyz etıledı.
Öŋırdegı jūmystyŋ barysyn baǧalai kele, Qanat Bozymbaev qazırgı basty mındet – eŋ tozyǧy jetken uchaskelerdı uaqytynda jaŋartyp, kommunaldyq infraqūrylymdy jylytu mausymyna tolyq daiyndau ekenın atap öttı.
«Qaraǧandy oblysynda jūmys jaqsy qarqymen jürıp jatyr: jylu men elektr jelılerınıŋ eŋ qatty zaqymdalǧan ärı tozyǧy jetken bölıkterı auystyryluda. Öŋırdıŋ mındetı – barlyq qajettı jūmysty 15 qyrküiekke deiın aiaqtap, gidravlikalyq synaqtardy ötkızu jäne jylytu mausymyna jüz paiyz daiyndyqpen kıru. Tüptep kelgende, mūnyŋ bärı halyq üşın jasalyp jatyr. Jylu, su jäne elektr quaty – adam kündelıktı paidalanatyn tırşılık közderı. Sondyqtan bızdıŋ maqsatymyz – būl qyzmetterdıŋ üzdıksız ärı tiımdı jūmys ısteuın qamtamasyz etıp, halyqtyŋ tūrmys sapasyn arttyru», — dedı Qanat Bozymbaev.
Qaraǧandy oblysyndaǧy jobalardy jüzege asyru kezınde otandyq öndıruşılerdıŋ önımderı belsendı türde qoldanylyp keledı. Sapar barysynda tanystyrylǧan nysandardyŋ basym bölıgınde qazaqstandyq önımder 95%-dan asady, al keibır jobalar boiynşa 100%-ǧa jetedı.
Sapar qorytyndysy boiynşa Qanat Bozymbaev qūrylys-montajdau jūmystarynyŋ merzımı men sapasyn qataŋ saqtaudy tapsyrdy. Jylytu mausymynyŋ apatsyz ötuıne tıkelei äser etetın nysandarǧa erekşe nazar audaryluy tiıs. Oblys äkımdıgı men jauapty ūiymdarǧa bekıtılgen kesteden keşıkpeu jäne jaŋǧyrtylatyn infraqūrylymnyŋ küzgı-qysqy kezeŋge tolyq daiyn boluyn qamtamasyz etu tapsyryldy.
